Mol ónim alý úshin aldymen jerdi qunarlandyrý kerek - jetisýlyq sharýa

TALDYQORǴAN. QazAqparat - Jetisý oblysy Aqsý aýdanynyń turǵyny Rınat Ádespaev - qarapaıym sharýa. 10 jyldan beri dándi daqyl ósirýmen aınalysady. Agrarlyq salany damytý úshin zamanaýı qondyrǵy ornatypty. Bolashaqta basqa da tehnologııalardy satyp alýdy kózdep otyr. Eren eńbegimen kópke úlgi bolǵan sharýamen QazAqparat tilshisi áńgimelesken edi.

Rınat Ádespaev - Abaı oblysynyń týmasy. Jetisýǵa kóship kelgeli 25 jyldan asqan. Qudaı qosqan qosaǵymen 3 bala tárbıelep otyr. Sharýashylyq salasyna jastaıynan aralasqan azamat búginde 1 500 gektarǵa ıelik etedi.

«Bizde jumys saǵat 5:00-de jınalyspen bastalady. Jigitter jumystaryna qaraı retteledi. Qaı jumysshy qaı jaqqa baratynyn anyqtaımyz. Sýshylar sýǵa ketedi. Frıgatchıktar frıgatka ketedi. Saǵat 6-da jumys bastalady. Túski 12-ge deıin jumys isteıdi. Kún ystyqta saǵat 15:00-ge deıin demalamyz. Sosyn kún batqansha eńbek etemiz», - deıdi sharýa.

Aıtýynsha, bıyl 800 gektarǵa bıdaı men soıa, 50-ine jońyshqa, 25 gektarǵa qyzylsha seýipti. 2022 jyly sý shashyratatyn qondyrǵy satyp aldy. Bıyl ónimniń mol shyǵatynyna senimdi.

«Egis alqabynan mol ónim alý úshin aldymen jerdi qunarlandyrý kerek. Sonymen qatar, ol kún raıyna baılanysty. Adamǵa, jerdiń qunarlylyǵyna, qaraýyna baılanysty. Bári jaqsy bolsa, jaqsy ónim beredi. Ýaqytynda seýip, ýaqytynda qaraý kerek. Ýaqytynda hımııalaý kerek», - deıdi Rınat Ádespaev.

Aýdan ortalyǵynda isin dóngeletip otyrǵan azamat 10 adamdy jumyspen qamtyǵan. Bolashaqta sharýashylyqqa jańa qondyrǵylar alyp, kásibin keńeıtýdi josparlap otyr.

Búgingi kúni Jetisý oblysynda dándi daqyldardyń 173,3 myń gektary nemese 53,4% oryldy, 301,7 myń tonna astyq bastyryldy, sonyń ishinde 155,8 myń tonna bıdaı, 145,0 myń tonna arpa, 907 tonna suly qambaǵa quıyldy. Ortasha gektar ónimdiligi 17,4 tsentnerdi bolyp otyr.

Oblystyq aýyl sharýashylyǵy basqarmasynyń málimetine qaraǵanda, kartoptyń 500 gektary qazylyp, 10,5 myń tonna, kókónis daqyldarynyń 1,8 myń gektary jınalyp, 52,3 myń tonna ónim alyndy. Al, baqsha daqyldarynyń 1,2 myń gektarynan 32,8 myń tonna ónim alyndy.

Egin oraǵyna 9,7 myń traktor, 993 kombaın jumyldyrylyp, bir lıtsenzııalanǵan astyq qabyldaý pýnkti, jalpy syıymdylyǵy 501,3 myń tonna bolatyn 380 astyq saqtaý qoımasy men 81 mehanıkalandyrylǵan qyrman jáne basqa da qajettilikter daıyndaldy.

Kúzgi dala jumystaryna oblysqa jalpy 7 924 tonna kepildendirilgen dızel otyny bólingen. Búgingi kúnge sharýashylyqpen kelisimshart jasalyp, jetkizý bastaldy.

Agrarlyq nesıe korporatsııasy arqyly kóktemgi jáne kúzgi dala jumystaryna 85 sharýa qojalyǵyna 1,7 mlrd teńgege jeńildetilgen nesıeler, sonyń ishinde «Keń Dala» baǵdarlamasymen 800 mln teńge, «AgroBıznes» baǵdarlamasy arqyly 900 mln teńge berildi.

Óńirde ónim jınaý áli de jalǵasyp jatyr.