Mohamad Adlı bın Abdýlla: Qazaqstan – Malaızııanyń Ortalyq Azııadaǵy eń iri saýda seriktesi

ASTANA. QazAqparat – Qazaqstan Malaızııanyń Ortalyq Azııadaǵy eń iri saýda seriktesi sanalady. Bul týraly búgin Aqordada Memleket basshysy Qasym-Jomart Toqaevqa senim gramotasyn tapsyrǵannan keıin Malaızııa Elshisi Mohamad Adlı bın Abdýlla aıtty, dep habarlaıdy QazAqparat tilshisi.

«Osynaý tamasha el – Qazaqstanda Malaızııa Koroliniń atynan ókildik etý men úshin úlken mártebe. Qazaqstan men Malaızııa 1992 jyldan beri yntymaqtastyqtyń barlyq salasynda jemisti qarym-qatynas ornatyp otyr. Sol ýaqyttan eki eldiń arasyndaǵy yntymaqtastyq tereńdep, keńeıe tústi. Saýda men ınvestıtsııa, ónerkásip, ıslamdyq qarjylandyrý, týrızm, mádenıet, joǵary bilim jáne tehnıkalyq kómek kórsetý salalaryndaǵy yntymaqtastyq jolǵa qoıyldy. Qazaqstan Malaızııanyń Ortalyq Azııadaǵy eń iri saýda seriktesi sanalady. Qazaqstan men Malaızııa arasyndaǵy yntymaqtastyq nyǵaıa túsedi dep senim artamyz. Ol úshin áleýet jetkilikti. Malaızııa Úkimeti Qazaqstan Úkimetimen yntymaqtastyǵyn jalǵastyrady», - dedi Malaızııa Elshisi.

Esterińizge sala ketsek, Qazaqstan Prezıdentine senim gramotalaryn Malaızııa Elshisi Mohamad Adlı bın Abdýlla, Saýd Arabııasy Koroldiginiń elshisi Faısal ben Hanıf ál-Kahtanı, Túrkııa Respýblıkasynyń elshisi Mýstafa Kapýdjý jáne Iran Islam Respýblıkasynyń elshisi Álı Akbar Djoýkar tapsyrǵan edi.