Mogerını: Jańa Jibek joly - mańyzdy ınfraqurylymdyq jobalardyń biri

STRASBÝRG. QazAqparat - Eýropalyq odaq pen Ortalyq Azıa elderi jaqyndasty. Bul týraly Strasbýrgtegi Eýropalyq parlamenttiń plenarlyq sessıasynda EO Syrtqy ister jáne qaýipsizdik saıasaty jónindegi Joǵarǵy ókili Federıka Mogerını málim etti, dep habarlaıdy «QazAqparat» HAA menshikti tilshisi. 

«Eýropa men Ortalyq Azıanyń bes eli buryn-sońdy qazirgideı jaqyn bolǵan joq. Olar - bizdiń kórshilerimiz. Jibek joly - ótkendi eske alý emes, eń mańyzdy ınfraqurylymdyq jobalardyń biri», - dedi eýropalyq dıplomatıanyń basshysy. 

Onyń aıtýynsha, Ortalyq Azıa qazirgi ýaqytta Eýropa men Azıa arasyndaǵy torap ispettes. 
«Aýǵanstandaǵy nemese Taıaý Shyǵystaǵy oqıǵalar biz úshin de mańyzdy. Olardyń qaýipsizdigi - bizdiń qaýipsizdigimiz», - dep atap ótti F.Mogerını.
EO dıplomatıa basshysy atap ótkendeı, eýropalyq kompanıalar tek óńirge ǵana emes, sondaı-aq Eýropalyq odaqqa paıda ákele otyryp, Ortalyq Azıany ınvestısıalaýǵa umtylýda. 
«Bıznes ortany jaqsartýǵa barlyǵymyz múddelimiz. Biz keńeıtilgen áriptestik pen yntymaqtastyq týraly kelisimderdiń jańa serpini boıynsha jumystardy bastadyq. Ondaı kelisimdi Qazaqstanmen jasastyq, qazir Qyrǵyzstanmen júrgizip jatyrmyz», - dedi F.Mogerını.
Sondaı-aq, ol EO syrtqy saıası vedomstvosynyń Ózbekstanmen, Túrikmenstanmen jańa kelisim boıynsha kelissózder júrgizýdi bastaıtynyn málim etti. 
Aıta keteıik, Eýropalyq Odaqtyń Ortalyq Azıa boıynsha jańa strategıalardy ázirleý prosesi 2017 jyldyń qyrkúıeginde bastaldy.