Modernızatsııanyń naqty baǵdarlamasy bolýy kerek - Kásipodaq basshysy shahtadaǵy oqıǵa týraly

ASTANA. QazAqparat - Eldegi shahtalar eń aldymen zamanaýı qaýipsiz jabdyqtarmen qamtamasyz etilýi tıis. QR Kásipodaqtar Federatsııasynyń Qaraǵandy oblysyndaǵy Kásipodaq ortalyǵynyń tóraǵasy Bolat Jumabekov Shahtınskidegi shahtada bolǵan qaıǵyly oqıǵaǵa baılanysty pikir bildirdi, dep habarlaıdy QazAqparat tilshisi.

Bolat Jumabekovtyń aıtýynsha, Qaraǵandy oblysyndaǵy Lenın atyndaǵy shahta – elimizdegi eń qaýipti ken oryndarynyń biri.

«Kenetten gaz atqylaý qaýpine baılanysty bul shahtada erekshe qaýipti. Oqıǵa kezinde eki brıgada jumys istep jatqan. Jaraqattanǵan bes adam basqa jaqta, burǵylaý jumystarynda bolǵan. Al, bes adam ókinishke qaraı, qaıtys boldy. Ol jerde kenetten metan gazy tarady. Shahta atmosferasynda otteginiń jetispeýshiliginen, gaz shyqqan kezde adam birden qulaıdy. Metan ıissiz, kózge kórinbeıdi, adamdy áp-sátte esinen tandyrady», - dep túsindirdi QazAqparat tilshisine Bolat Jumabekov.

Aýrýhanaǵa túsken jumysshylar jarylys tolqynymen qulaǵan kezde soqqy alǵan bolýy múmkin.

«Gaz shyǵaryndysy kezinde jarylys tolqyny paıda bolady. Jumysshylar tar shahtanyń bekinisine soǵylǵan bolýy múmkin. Zardap shekkenderde bas-mı jaraqaty bar. Tolqyn uzaǵan saıyn gaz kontsentratsııasy tómendeıtindikten, olar aman qaldy», - dedi spıker.

Sondaı-aq, ol mundaı jaǵdaılar qaıtalanbas úshin qandaı shara qoldaný kerektigi týraly oı bólisti.

«ArselorMıttal Temirtaý» kompanııasy bos ýádeler men kóp sózden naqty iske kóshýi kerek. Kásiporyn 1996 jyly keldi, osy ýaqytqa deıin birde-bir jańa qurylǵy joq. Jańadan alǵany: bıylǵy burǵylaý qondyrǵylary men 20-dan astam týnneldik tehnıka. Jańa taý-ken-shahta jabdyqtary qajet. Damyǵan elderdiń shahtalarynda gaz shyǵaryndylary bolmaıdy.

Birinshiden, bizdegi jaǵdaı qıyn. Sondyqtan, eń aldymen, qaýipsiz jabdyq bolýy kerek. Ótken jyly qarashada Abaı kenishinde bolǵan oqıǵadan keıin jańa tehnıka alýǵa ýáde bergenimen, qytaılyq jabdyqty satyp aldy. Múmkin olar sol jaqtyń shahtalaryna jaramdy bolar. Mine, ınvestorymyz osyndaı, ókinishti. Jalpy, bizdiń taý-ken-geologııalyq jaǵdaıymyzǵa sáıkes keletin modernızatsııa baǵdarlamasy bolýy kerek. Kenshi qaýipsiz eńbek jaǵdaılary jasalǵan jerge jumysqa baratynyn bilýi kerek. Alda ne kútip turǵanyn eshkim bilmeıdi. Geologııa qyzmeti, tehnıkalyq qyzmetkerler – barlyǵy qaýipsizdikti qamtamasyz etýge jaýapty bolýy kerek», - dep esepteıdi B. Jumabekov.

Eske salsaq, búgin túnde Qaraǵandy oblysy Shahtınsk qalasynda Lenın atyndaǵy shahtada apat bolyp, «ArselorMıttal Temirtaý» kenishinde 5 adam kóz jumdy.

Memleket basshysy Qasym-Jomart Toqaev qaza tapqan jumysshylardyń otbasylaryna kóńil aıtty. Buǵan deıin Prezıdent Qaraǵandy oblysyna barǵan saparynda aımaqtyń óndiristik kásiporyndarynda eńbek qaýipsizdigin qamtamasyz etý máselesi áli kúnge syn kótermeıtinin atap ótip, kásiporyndardyń jaýapkershiligin kúsheıtetin júıeli sharalar qabyldaýǵa tapsyrma bergen bolatyn. «Qaraǵandy sııaqty ındýstrııasy damyǵan oblys úshin bul – mańyzdy másele. Mysaly, tek 2022 jyly «ArselorMıttalTemirtaý» AQ obektilerinde jumysshylar qaza tapqan birneshe oqıǵa tirkeldi. Іri kompanııalar óndiristi jańǵyrtýǵa árdaıym ınvestıtsııa quıý kerek. Ýákiletti organdar óndiristik apattardyń kóbeıgeni úshin kásiporyndardyń jaýapkershiligin kúsheıtetin júıeli sharalar qabyldaýy qajet», - degen edi Prezıdent.

«ArselorMıttal Temirtaý» AQ Kómir departamentiniń dırektory Lenın atyndaǵy shahtadaǵy apattyń sebebin málimdedi.

Premer-Mınıstr Álıhan Smaıylovtyń ókimimmen Tótenshe jaǵdaılar mınıstri ıÝrıı Ilın jetekshilik etetin Úkimettik komıssııa quryldy.

Qaraǵandy oblysynyń ákimdigi shahtada qaza bolǵandardyń tizimin jarııalady.

Tótenshe jaǵdaılar mınıstri ıÝrıı Ilın málim etkendeı, «ArselorMıttaldyń» 8 shahtasynda jumys bir táýlikke toqtatyldy.

Foto: depositphotos.com