Mobılografııa boıynsha «MOB FEST» respýblıkalyq festıvaliniń 20 jeńimpazy Nıý-Iork kıno akademııasynda taǵylymdamadan ótedi
Mundaı múmkindik Qazaqstan Respýblıkasy Prezıdenti janyndaǵy «Dara» daryndylardy qoldaý qory men Nıý-Iork kıno óneri akademııasynyń (New York Film Academy) arasyndaǵy Memorandým aıasynda týyp otyr, dep habarlaıdy «QazAqparat» HAA tilshisi.
Memorandýmǵa QR Prezıdenti janyndaǵy «Dara» daryndylardy qoldaý qorynyń basshysy Nurlan Qoıanbaev pen Los-Andjelestegi Nıý[1]Iork kıno akademııasy kampýsynyń dekany Den Makler qol qoıdy.
New York Film Academy irgesindegi taǵylymdama barysynda «MOB FEST» jeńimpazdary rejıssýra, beınemontaj, stsenarıı jazý baǵdarlamalary boıynsha bir aptalyq oqý kýrsynan ótedi.
Eske sala keteıik, mobılografııa boıynsha «MOB FEST» respýblıkalyq festıvali Qazaqstanda tuńǵysh ret ótkizilip otyr. Festıval uıymdastyrýshysy – Qazaqstan Respýblıkasy Prezıdentiniń janyndaǵy «Dara» daryndylardy qoldaý qory.
Baıqaýdyń І kezeńinde 100 úzdik qatysýshy iriktelip alyndy. Qorytyndy kezeńge ótken olar endi aqtyq synda baq synaıdy. Baıqaý nátıjesinde top jarǵan 20 jumys avtory AQSh-ta taǵylymdamadan ótedi. Sondaı-aq 40 jeńimpaz aqshalaı syılyqpen marapattalsa, 40 qatysýshyǵa «Mobılografııa PRO» kýrsyn onlaın oqýǵa múmkindik beriledi.
Qazaqstan Respýblıkasy Prezıdentiniń janyndaǵy «Dara» daryndylardy qoldaý qory talantty jastardy qoldaýǵa, olardyń shyǵarmashylyq áleýetin júzege asyrýǵa jáne Qazaqstandaǵy kreatıvti ındýstrııany damytýǵa baǵyttalǵan.