Mobıldi aýdarymdar: Jasyryn tabys erteli-kesh anyqtalady

<p>ASTANA. KAZINFORM &ndash; Memlekettik kirister komıteti Jeke tulǵalardyń kiristerin ákimshilendirý basqarmasynyń bas sarapshysy Ersaıyn Kóptileýuly mobıldi aýdarymdardy baqylaýda 100 adam mejesi qalaı belgilengenin túsindirdi.</p>

− Osy ólshemshartty belgilegende bir aı merzimin qoıý durys emes dep eseptedik, sebebi bir aıda 100 túrli adamnan mobıldi aýdarym alý múmkindigi kóbirek. Óıtkeni toı-tomalaq bar, basqa da sharalar bar. Al úsh aı qatarynan aýdarym tússe, bul naqty kásipkerliktiń belgisi bola alady. 30-40 adam desek te, kásipkerlikke qatysy joq jeke tulǵalardyń ilinip ketýi múmkin edi. Sondyqtan 100 mejesi kásipkerlerdi anyqtaýǵa múmkindik beredi dep eseptedik, − dedi Ersaıyn Kóptileýuly agenttiktiń «Bizdin orta» podkastynda.

Bul rette aýdarymdar sany júzge jetpeı, 99 aýdarym ǵana bolsa, tekserýge ilinbeıdi. Spıker keı kásipkerler ólshemsharttan aınalyp ótý joldaryn qarastyrýy múmkin ekenin moıyndaıdy.

− Eger kásipkerler ólshemsharttan aınalyp ótý joldaryn taýyp jatsa, demek biz de kásipkerlerdi anyqtaý múmkindigin qaıta qarastyramyz. Bul baǵytta jumysymyzdy úzdiksiz júrgizemiz +++ Kiris organdary jasyryn tabysty erteli-kesh anyqtaıdy, bizde eskirý merzimi – 3 jyl. Sondyqtan kásipkerlerge óz isine jaýapkershilikpen qaraýyn suraımyz, − deıdi spıker.

Komıtet ókili qaıtadan qolma-qol qarajatqa kóshken kásipkerlerge ákimshilik shara týraly eskertti.

− Eger satýshy sizdiń kartamen tóleýińizge shekteý qoısa, memlekettik kirister organdaryna júginýge boldy. Alǵashynda kásipkerge eskertý jasalady, eger ol qaıtalansa – 40 AEK aıyppul salynady. Bul 157 myń teńge, - dep túsindirdi E.Kóptileýuly.

Aıta keteıik, jeke kásipker retinde tirkelmeı kásip júrgizgenderge 15 AEK aıyppul (58 980 teńge) ákimshilik shara kózdelgen.

Memlekettik kirister komıteti mobıldi aýdarym boıynsha qalaǵan ýaqytynda kez kelgen tulǵanyń shotyn teksere almaıdy.