Mobıldi aýdarym boıynsha salyqtyq baqylaý qalaı júrgiziledi

<p>Bıyl Memlekettik kirister komıtetine bankterden banktik shottaryna kásipkerlik qyzmetke baılanysty aqsha túsetin azamattar týraly málimetter túse bastady. Kásipkerlik qyzmetti júzege asyrý belgilerin aıqyndaý ólshemsharty jeke tulǵanyń úsh aı qatarynan aı saıyn ár túrli tulǵalardan jeke banktik shotqa 100-den astam aýdarym alýy bolyp sanalady, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Memlekettik kirister komıtetiniń málimetinshe, aqparat bankterden kezeń-kezeńmen beriledi:

1) 2023 jylǵy 1 qańtardan bastap – memlekettik qyzmetshiler, olarǵa teńestirilgen adamdar jáne olardyń jubaılary boıynsha (2022 jyldyń qorytyndysy boıynsha);

2) 2024 jylǵy 1 qańtardan bastap – memlekettik mekemelerdiń, kvazımemlekettik sektor sýbektileriniń qyzmetkerleri jáne olardyń jubaılary boıynsha (2023 jyldyń qorytyndysy boıynsha);

3) 2025 jylǵy 1 qańtardan bastap – dara kásipkerler, zańdy tulǵalardyń basshylary jáne olardyń jubaılary boıynsha (2024 jyldyń qorytyndysy boıynsha);

4) 2026 jylǵy 1 qańtardan bastap – halyqtyń qalǵan bóligi boıynsha (2025 jyldyń qorytyndysy boıynsha).

Búgingi tańda aqparat tek memlekettik qyzmetshiler, olarǵa teńestirilgen adamdar jáne olardyń jubaılary boıynsha alyndy.

«Baqylaý sharalary adal salyq tóleýshilerge áser etpeıdi jáne jasyryn kirister men tirkelmegen kásipkerlerdi anyqtaýǵa baǵyttalǵanyna nazar aýdaramyz. Bul rette jeke tulǵalar ózderiniń jeke maqsattary úshin mobıldi aýdarymdar jasaı jáne qabyldaı alady (týystaryna, dostaryna aýdarymdar, ata-analar men balalarǵa kómek, sondaı-aq basqa da ómirlik jaǵdaılar boıynsha)», - delingen komıtet habarlamasynda.