Mobıldi azamattar bazasyna jyl basynan beri 1 mln adam tirkeldi

NUR-SULTAN. QazAqparat - «Azamattarǵa arnalǵan úkimet» memlekettik korporatsııasy 2019 jyldyń alǵashqy tórt aıynda 1,1 mln asa azamatty mobıldi azamattar bazasyna tirkedi. Osylaısha atalmysh bazaǵa tirkelgen qazaqstandyqtardyń sany 6,8 mıllıonǵa jýyqtap otyr, dep habarlaıdy QazAqparat.

Mobıldi azamattar bazasyna tirkeý erikti túrde júrgiziledi, munda azamattardyń jeke sáıkestendirý nómiri men uıaly telefon nómiri baılanystyrylyp, bazaǵa engiziledi. Bul arqyly derekqorda jeke málimetteri bar adamdar halyqqa qyzmet kórsetý ortalyǵyna barmaı, birneshe memlekettik qyzmet pen servısti onlaın túrde ala alady.

Máselen, bazaǵa tirkelgender egov.kz portalynyń qupııasózin umytqan jaǵdaıda, uıaly telefondaryna birretik qupııasózge suraý jibere alady. Smartfondaǵy mgov.kz qosymshasynyń 81 túrli qyzmetin qoldana alady. Jańa bosanǵan analar proaktıvti qyzmet aıasynda, bala dúnıege kelgen shaqta jiberilgen sms-ke jaýap berý arqyly týý kýáligi men járdemaqynyń taǵaıyndalýyna ótinish berip, bóbekti balabaqsha kezegine qoıa alady.

Sonymen qatar bazaǵa tirkelgen azamattar telegram-daǵy egovkzbot kómegimen 25 qyzmetti emin-erkin qoldana alady. Bul servıs uıaly telefon arqyly mekenjaı, sottylyqtyń bolmaýy, dıspanserlerdiń esebinde turmaý týraly, jyljymaıtyn múliktiń bolý/bolmaýy sııaqty birqatar anyqtamany alyp, dáriger qabyldaýyna jazylýǵa, HQO kezegin onlaın brondaýǵa, aıyppuldardyń bar/joǵyn tekserýge múmkindik beredi. Atalmysh bot 2018 jyly iske qosyldy. Osy ýaqytqa deıin ony 300 myńǵa jýyq adam qoldanyp, 162 myń ret mekenjaı anyqtamasyn alyp úlgerdi.

Qazaqstandyqtar mobıldi azamattar bazasynyń tiziminde tirkelgen/tirkelmegenin egov.kz portaly arqyly teksere alady.