«MOB FEST» festıvali: AQSh-ta taǵylymdamadan ótetin mobılograftar tizimi jarııalandy
Qazaqstan Respýblıkasy Prezıdentiniń janyndaǵy «Dara» talantardy qoldaý qory uıymdastyrǵan festıvalge 16 men 40 jas aralyǵyndaǵy 7 524 qazaqstandyq mobılograf qatysqan. Elimizde tuńǵysh ret ótkizilip otyrǵan baıqaýǵa olar 1537 vıdeo-jumys usyndy.
Baıqaýdyń birinshi kezeńiniń qorytyndysy boıynsha úzdik 100 mobılografov iriktelip, olar aqtyq kezeńdegi ekinshi tapsyrmany oryndaýǵa jiberilgen bolatyn. Baıqaýda baq synaǵandar arasynan 20 vıdeojumys avtorlary eń myqty dep tanylyp, olar Nıý-Iork kıno óneri akademııasynan (NYFA) taǵylymdamadan ótýge joldama aldy. Osylaısha qazaqstandyq 20 jas mobılograf AQSh-taǵy bedeldi akademııada on kún oqıtyn bolady.
«Dara» talanttardy qoldaý qorynyń prezıdenti Nurlan Qoıanbaev jeńimpazdardy marapattaý saltanatynda, Qordyń jumysyna toqtaldy. Onyń aıtýynsha, Qordyń negizgi maqsaty - talantty jastardy qoldaý, olardyń shyǵarmashylyq áleýetin júzege asyrýy úshin múmkindikter ashý, sondaı-aq Qazaqstanda kreatıv ındýstrııany damytý.
«Talanttardy qoldıtyn «Dara» qorynyń bastamasymen bundaı festıval respýblıka deńgeıinde alǵash ret ótip jatyr. Shynymdy aıtsam, men osy festıvalge 7,5 myń adam qatysady dep oılaǵan joqpyn. Al baıqaýǵa túsken vıdeolardy kórip, rıza boldym. Aýyldan shyqqan nebir talantty jastar bar eken. Jalpy, biz buǵan deıin Amerıkaǵa baryp, New York Film Academy rektorymen kezdesip, jastarymyzdy sonda oqytý týraly oıymyzdy aıtqan edik. Olar qarsy bolǵan joq. Endi jastarymyz Nıý-Iorkte bilim alyp, ózderine tájirıbe jınaıtyn bolady. Jastardyń arasynan jaı ǵana smartfonmen de elimizdi álemge tanytatyn myqty mamandar, rejısserlar, operatorlar shyǵady dep senemiz», - dedi Nurlan Qoıanbaev.
Onyń aıtýynsha, Qazaqstanda bundaı is-sharalar jıi ótkizilýi tıis. Sondaı-aq, Nurlan Qoıanbaev buqara halyq pen jastar arasynda sport túrlerin damytý maqsatynda byltyr Qor «Tartyl fest» festıvalin uıymdastyrǵanyn da atap ótti.
«Mob Fest» festıvaliniń ambassadory Ashat Shynáli baıqaýǵa qatysýshylar jumysyn joǵary baǵalady. Ol osy festıval arqyly talantty, kreatıv jastarǵa múmkindik beriletinin, daryndylardyń jolyn ashý maqsaty bolǵanyn atap ótti.
«Baıqaý óte joǵary deńgeıde ótti. Jastardyń óresi bıik, oıy tereń ekenin baıqadyq. Qatysýshylardyń deni búgingi qoǵamnyń ózekti máselelerin kótergen. Vıdeolar óte tamasha, sapaly túsirilgen. Bulaı bolady dep oılamaǵanymyz da ras. Іriktep alý qıynǵa soqty. Olar ártúrli salada jumys isteıtin azamattar, árqaısysy ónerli. Qazir kóptegen bıznes vıdeo-kontent arqyly damıdy. Sondyqtan da, búgin baq synap otyrǵan osyndaǵy árbir talantty jastyń bolashaǵy zor dep oılaımyn», - dedi Ashat Shynáli.
Baıqaý jeńimpazdary, ıaǵnı 20 úzdik jumys avtorlary Nıý-Iork kıno óneri akademııasynda (NYFA) taǵylymdamadan ótýge joldama aldy. Budan bólek, 40 jeńimpaz mobılograf 100 myń teńge kólemindegi aqshalaı syılyqpen marapattalsa, 40 qatysýshyǵa «Mobılografııa PRO» kýrsyn onlaın oqýǵa múmkindik beriledi.
Festıvalge qatysýshylardyń biri 20 jastaǵy Sanjar Meıirmanov Qazaqstanda mobılografııa óte jaqsy damyp keledi dep sanaıdy. Onyń osy salada júrgenine úshinshi jyl boldy, sondaı-aq Qonaev qalasynda ol óziniń agenttigin ashyp, shákirtter tárbıeleýde.
«Men buǵan deıin barber bolǵanmyn, biraq ol jumystan lázzat alǵan joqpyn. Keıin mobılograf bolamyn dep sheshtim. Birqatar elderde bilim aldym, biliktiligimdi arttyrdym. Bul óte qyzyq sala. Qazirgi tańda birneshe sheteldiń ókilderimen áriptestik ornatqanmyn, búginge deıin alty memlekette bolyppyn. Men negizi kommertsııalyq tapsyrystardy, Reals-ter túsiremin. Bir baıqaǵanym, shetelde mobılografııa qatty damymaǵan eken, al Qazaqstanda damýǵa mine, úlken qadam basyp jatyr. Mobılografııa – ol damýǵa bastaıtyn jol, shyǵarmashylyq erkindik, kreatıv, munda qolynda telefon bolsa bolǵany, vıdeo túsirip, adamdarǵa jaqsy kóńil-kúı syılaısyń. Búgingi festıval elimizdiń jastary úshin ózin kórsetýge jaqsy múmkindik dep sanaımyn», - dedi Sanjar Meıirmanov.
Respýblıkalyq konkýrstyń taǵy bir qatysýshysy Nazar Sársen bul mamandyqtyń ózindik qyr-syry baryna toqtaldy. Onyń paıymynsha, myqty mobılograf bolý úshin eń bastysy ynta men jaqsy ıdeıa kerek.
Saltanatty marapattaý rásimine elimizdiń tanymal akterleri, belgili blogerler de qatysyp, aqjarma tilekterin bildirdi.
Sonymen, AQSh-qa joldama alǵan mobılograf jastar tizimi mynadaı:
Jumataı Ahmethan - Qostanaı
Rýslan Abjalov - Shymkent
Tahyr Turar - Almaty
Shoqjan Bolat - Taraz
Qaharman Shaqarbekuly - Qyzylorda
Asanbekov Súndet - Shymkent
Salaýat Janarbek - Aqmola oblysy
Ramazan Myrzataıuly - Almaty
Dýlat Aıtýǵanov - Astana
Imanǵalı Maqsoluly - Almaty
Ilıas Aıdaruly - Almaty
Qýatbaı Myrzabek - Almaty
Myltyqbaı Arýjan
Rahat Daýylbaev - Taldyqorǵan
Sabyrjan Joldybaev;
Eskendir Kamenov - Almaty
Jaqsylyq Saparbek - Astana
Tilkeshov Erbatyr - Oral
Izenova Karına - Aqtaý
Qaıyp Erqanat - Shymkent.