«Moana» anımatsııalyq fılminiń qazaq tilinde tusaýy kesiledi

ASTANA. QazAqparat - Búgin Almaty qalasyndaǵy Kinopark 11 IMAX (Esentai Mall), Astana qalasyndaǵy Kinopark 8 IMAX («Saryarqa» SOSO) jáne Shymkent qalasyndaǵy Cinemax Shymkent Multiplex kınoteatrlarynda Disney stýdııasynyń «Moana» anımatsııalyq fılminiń qazaq tilindegi aldyn ala kórsetilimi ótedi.

«Moana» - «Bolashaq» korporatıvtik qory 2016 jyly qazaq tilinde dýblıajdaǵan úshinshi kınokartına jáne 2011 jyldan beri dybystalǵan on altynshy fılm. Moana - Dısneı stýdııasynyń jańa hanshaıymy, Týı kóseminiń qyzy, 14 jasar qııalshyl qyz, ol jartylaı qudaı-keıipózgertkish Maýımen birge muhıtqa saıahatqa attanady. Oqıǵalar jelisi 2000 jyl buryn Tynyq muhıtynyń araldarynda órbıdi. Úlken ekranǵa Dısneı stýdııasynyń tolyqmetrajdy «Moana» mýltfılminiń qazaq tilindegi treıleri shyǵyp jatyr. Mýltfılmniń Qazaqstandaǵy tusaýkeseri 2016 jyldyń 1-shi jeltoqsanynda ótedi.

Dýblıajǵa 35-ten artyq akter qatysty. Basty keıipkerlerdi Lıdııa Káden, Nazerke Serikbolova, Maqpal Isabekova, ánshi Búrkit, Jánibek Musaev, Syrym Qashqabaev, sondaı-aq basqa akterler men qazaqstandyq estrada ártisteri dybystady.

Qazaq dýblıajynyń rejısseri - Rıta Ábisheva, jobanyń mýzykalyq jetekshisi - Borambaeva Kúnimgúl. Jobany uıymdastyrýshylar - «Marwin» kompanııasynyń qoldaýymen «Bolashaq» korporatıvtik qory. Dýblıajdyń demeýshisi - «ACD Group» JShS.