M.Myrzaǵalıev Hıýstonda CERAWeek energetıkalyq konferentsııasyna qatysty
CERAWeek — S&P Global aqparattyq-taldaý kompanııasy jyl saıyn Hıýston qalasynda (AQSh) ótkizetin energetıka máselelerine arnalǵan eń iri konferentsııa.
Bıyl CERAWeek 2024 kóp ólshemdi, asa jyldam jáne kóp túrli energetıkalyq aýysý strategııalaryn zertteıdi. Konferentsııa álemniń túkpir-túkpirinen energetıkalyq kompanııalardyń basshylary men ókilderi, saıasatkerler, energetıka, qarjy, ekologııa salasynyń sarapshylary jáne basqa da delegattardy jınady.
18 naýryzda «QazMunaıGaz» UK AQ Basqarma Tóraǵasy Maǵzum Myrzaǵalıev CERAWeek konferentsııasy aıasynda «Basty nazarda: Munaı jáne gaz resýrstaryn ıgerý» paneldik sessııasynda sóz sóıledi. Sessııaǵa Eni, Schlumberger ı Woodside Energy basshylary da qatysty.
M. Myrzaǵalıev óz sózinde QMG-nyń geologııalyq barlaýdy jandandyrý baǵytyndaǵy josparlary týraly, sondaı-aq kompanııanyń eldegi ınvestıtsııalyq ahýaldy jaqsartý maqsatynda zańnamany ózgertýge qatysty belsendi jumysyna toqtaldy. Ol Qazaqstan munaı-gaz sektorynda úlken ınvestıtsııalyq múmkindikter usynatynyn atap ótti.
«Biz halyqaralyq kompanııalardy Kaspıı teńizinde qurlyq pen qaırańdaǵy jobalardy júzege asyrýǵa seriktes retinde qarastyrýǵa daıynbyz», — dep atap ótti M. Myrzaǵalıev.
QMG basshysy Qazaqstannyń kómirsýtek resýrsy úlken potentsıalǵa ıe ekenin, al Kaspıı mańy basseıniniń qory áli de ıgerilmegenine nazar aýdardy. Onyń aıtýynsha, Qazaqstan Respýblıkasynyń Úkimeti munaı-gaz sektoryna sheteldik ınvestıtsııalardy tartýdy jalǵastyrýǵa nıetti. 2023 jyldan bastap Memleket basshysynyń tapsyrmasymen geologııalyq barlaý jáne gaz jobalary úshin tartymdy salyq jáne normatıvtik-quqyqtyq preferentsııalar (Jaqsartylǵan modeldik kelisimshart) engizildi. JMK obektileriniń qataryna teńiz jáne gaz jobalary, sondaı-aq qurlyqtaǵy kúrdeli óndirý jobalary kiredi.
«Bul ózgerister ınvestorlar úshin munaı-gaz ken oryndarynda barlaý jáne ıgerý jumystaryn bastaý úshin biregeı múmkindikter usynady. 2023 jyly 6 aqpanda Qazaqstanda «Qalamqas-teńiz, Hazar, Áýezov» jobasy boıynsha kómirsýtekterdi óndirýge arnalǵan, JMK sharttaryna negizdelgen alǵashqy kelisimshartqa qol qoıyldy, joba strategııalyq seriktespen birlesip iske asyrylatyn bolady», — dep túıindedi M.Myrzaǵalıev.