Mıtıngte BAQ quqyǵy shektelip jatsa, ákimdik ony tirkep otyrýy kerek – Tamara Kaleeva

NUR-SULTAN. QazAqparat – Halyqaralyq «Ádil sóz» sóz bostandyǵyn qorǵaý qorynyń prezıdenti Tamara Kaleeva beıbit jıyndarǵa qatysatyn jýrnalısterdiń quqyǵyn qorǵaýǵa qatysty óz usynysyn bildirdi, dep habarlaıdy QazAqparat tilshisi.

«Eń aldymen Aqparat jáne qoǵamdyq damý mınıstrliginiń ashyqtyǵyn atap ótkim keledi. Búginge deıin mundaı shynaıy konstrýktıvti talqylaý kóp bolǵan emes. Biz bul máseleni óz ujymymyzda ǵana talqylaıtyn edik. Atap aıtqanda keshe biz óz bastamamyzben «Ádil sóz», Internews, Quqyqtyq medıa-ortalyq, Informbıýromen birigip, shaǵyn talqy ótkizdik. Álbette bul erejelerdiń eń bir artyqshylyǵy – baspasóz ortalyqtaryn qurý. Áý basta bul qadam jýrnalısterdiń quqyǵyn shekteýi múmkin degen pikir aıtylǵan edi. Alaıda erejeler boıynsha júrgizilgen jumys bul qaýipti seıiltkendeı boldy», - dedi Tamara Kaleeva Aqparat jáne qoǵamdyq damý mınıstri Aıda Balaevanyń qatysýymen ótken onlaın-kezdesýde.

Qoǵam ókili talqylanýy tıis máselelerdi ortaǵa saldy.

«Beıbit jınalysqa qatysatyn jýrnalıst» degen ataýdyń ózin ajyratyp alaıyq. Ol beıbit jınalysqa qatysýshy, kórermen nemese jýrnalıst retinde qatysa ma? Biz ózimizdiń usynysymyzdy ortaǵa salyp, «beıbit jıynda aqparatty jınaý, daıarlaý jáne taratý boıynsha kásibı qyzmetin atqaratyn jýrnalıstik jumys» dep engizdik. Bizge ataýdy ózgertpek kerek. Sebebi zańda áý bastaǵydaı jazylǵan dedi. Zań bolsa bolsyn, degenmen qaǵıdattaǵy ataýdy osylaı ózgertýdi usynamyz», - dedi ol.

Sonymen qatar ákimdikterge beıbit jıyndarda BAQ quqyǵy shektelip jatsa, ákimdik ony tirkep otyrýy kerektigi usynylǵan.

«Aqparat jáne qoǵamdyq damý mınıstrligi bul másele Qylmystyq kodeks sheńberinde retteletinin habardar etti. Biraq biz is qozǵaý týraly emes, quqyqtyń shektelýin tirkeý týraly aıtyp otyrmyz. ıAǵnı jýrnalısti bir jerge kirgizbeı jatsa nemese qolynan kamerany tartyp alsa, ony tirkeýge bola ma?», - dep usynysyn engizdi Tamara Kaleeva.

Buǵan deıin habarlaǵanymyzdaı, Aqparat jáne qoǵamdyq damý mınıstrliginiń Facebook paraqshasynda jýrnalısterdiń beıbit jıyndarda qyzmet etý qaǵıdalary talqylanǵan bolatyn.

Onlaın-kezdesý barysynda BAQ basshylary beıbit jınalystarǵa qatysatyn jýrnalısterdiń quqyǵyn qorǵap, jumysyn júrgizýge qatysty birqatar usynysty ortaǵa saldy .