Mıtıng kezinde bir júkti áıel zardap shekti – Densaýlyq mınıstri

NUR-SULTAN. QazAqparat – QR Densaýlyq saqtaý mınıstri Ajar Ǵınııat eldegi tártipsizdikter kezinde zardap shekkender týraly sońǵy derekterdi málim etti, dep habarlaıdy QazAqparat tilshisi.

«Óńirlerdiń densaýlyq saqtaý basqarlamarynyń shuǵyl derekteri boıynsha, Tótenshe jaǵdaı rejımi engizilgen kezden bastap, jalpy eldegi terrorıstik aktilerdiń saldarynan 2 739 zardap shegýshi medıtsınalyq kómekke júgingen.

Qazirgi tańda 200 adam statsıonarlyq em alyp jatyr. Adamdar jazylyp shyǵyp, ári qaraı ambýlatorlyq emdelýge baǵyttalýda», -dedi mınıstr Ortalyq kommýnıkatsııalar qyzmetinde ótken brıfıngide.

Onyń málimeti boıynsha, qazir reanımatsııalyq bólimshelerde aýyr jaǵdaıda jatqan 14 naýqas bar.

«Onyń ishinde tórteýi Almatyda, bireýi Almaty oblysynda, beseýi Qyzylorda oblysynda.

Medıtsınalyq uıymdarda kóz jumǵandarǵa kelsek, búgingi tańda 177 naýqas qaıtys boldy. Sońǵy 3 kúnde reanımatsııada jatqan 2 naýqastyń jaǵdaıy nasharlap, kóz jumdy. Bizdegi derek boıynsha, mıtıngige qatysýshy 1 júkti áıel zardap shegip, Talǵar aýdandyq ortalyq aýrýhanasyna túsken. Ony dárigerler qutqaryp qalǵan. Almatyda 5 jáne 12 jastaǵy 2 bala qaıtys boldy degen málimet bar», - dedi Ajar Ǵınııat.