Mysyrda I ǵasyrǵa jatatyn Rım áripteri tabyldy
Smart-news jazǵandaı, Egıpettegi ejelgi úı janýarlary zıraty Rım tarıhyn zertteýge arnalǵan «altyn kenishke» aınalǵany qashan. Ǵalymdar toby janýarlar zıratyn 2011 jyly tapqan bolatyn. Jýyrda arheologtar mysyq, ıt jáne maımyl beıitteriniń janynan 1900 jyl buryn Rım júzbasylarynyń (áskerı jetekshilerdiń) qolymen jazylǵan hattardy tapty.
Rım Egıpetti kóptegen ǵasyr boıy (shamamen 30-dan 600-ge deıin) basqarǵany belgili. Sáıkesinshe, bul aımaqta Rım eskertkishteri jıi kezdesedi. Jyl saıyn arheologtar qazba jumystaryn tııanaqty júrgizip keledi. Buǵan deıin janýarlar jerlengen jerden qysh ydystar, Rım monetalary tabylǵan bolatyn.
Zertteýshiler Rım legıondarynyń bólimshelerin basqarǵan áskerı ofıtserlerdiń papırýsqa jazǵan hattarynyń tabylýy kezdeısoq ekenin alǵa tartyp otyr. Olardyń paıymdaýynsha, ejelgi rımdikter papırýstardy zıratqa irgeles ǵımaratta saqtaýy múmkin. Keıin nysan qırap, hattar shashyrap, zıratqa túsken bolýy múmkin.
Tabylǵan hattarda Rım júzbasylarynyń birneshe esimi atalady: Haosýs, Lýtsınıı jáne Petronıı. Hattardyń birinde Petronıı túıemen júretin rımdik sarbazdar bólimshesi arqyly aqsha jiberip jatqanyn jazady. Sondaı-aq, Lýtsınııden sarbazdarǵa buzaý eti men shatyr taıaqtaryn berýdi suraıdy.