Mysyr prezıdenti 12 jylda alǵash ret Túrkııaǵa keldi

<p>ASTANA. KAZINFORM &ndash; Mysyr prezıdenti Ábdel Fattah ál-Sısı Túrkııa prezıdenti Rejep Taıyp Erdoǵanmen kelissózderge qatysý úshin búgin resmı saparmen Ankaraǵa keldi. Bul aımaqtyq derjavalar arasyndaǵy qarym-qatynas jaqsarǵaly bergi eki el arasyndaǵy sońǵy 12 jyldaǵy alǵashqy prezıdenttik sapar.</p>

Kezdesý Rejep Taıyp Erdoǵannyń aqpan aıynda Kaırge saparynan keıin, 2012 jyldan beri birinshi ret, onjyldyqta qatty shıelenisken qarym-qatynasty qalpyna keltirý jolyndaǵy mańyzdy qadam boldy.

Mysyr prezıdentiniń 2014 jyly qyzmetke kiriskennen bergi Ankaraǵa alǵashqy sapary túrik áriptesi R. Erdoǵannyń shaqyrýymen júzege asyrylady.

- Túrkııa men Egıpet arasyndaǵy qarym-qatynas barlyq aspektilerde qarastyrylady, sondaı-aq yntymaqtastyqty odan ári damytý boıynsha aldaǵy kezeńdegi yqtımal birlesken qadamdar talqylanady, - dep habarlady Túrkııa prezıdentiniń baspasóz qyzmeti.

Bir kúndik sapar aıasynda eki eldiń joǵary deńgeıli strategııalyq yntymaqtastyq keńesiniń birinshi otyrysy ótedi. Onda Túrik-Mysyr qarym-qatynastary jan-jaqty qarastyrylyp, ekijaqty saýda aınalymyn jylyna 10 mıllıard dollardan 15 mıllıard dollarǵa deıin arttyrý úshin jasalýy múmkin ortaq qadamdar talqylanady.

Mysyr men Túrkııa basshylarynyń kelissózderinde Palestına-Izraıl qaqtyǵystaryn retteý jáne basqa da aımaqtyq jáne jahandyq problemalardy talqylaý josparlanǵan.

«Eki jaqty qarym-qatynastardan basqa, ózekti aımaqtyq jáne jahandyq máseleler, ásirese Izraıldiń Gaza sektory men basyp alynǵan Palestına aýmaqtaryna jasaǵan shabýyldaryna qatysty pikir almasý bolady», - dep qosty Túrkııa prezıdentiniń baspasóz qyzmeti.

Sapar barysynda eki el energetıka, qorǵanys, týrızm jáne bilim berý sııaqty salalardy qamtıtyn 20-ǵa jýyq kelisimge qol qoıady. Sondaı-aq kún tártibinde jańartylatyn energııa jáne suıytylǵan tabıǵı gaz (STG) salasyndaǵy yntymaqtastyq máseleleri qarastyrylady.

Túrkııaǵa memleket basshylary deńgeıindegi sońǵy sapar 2012 jyly jasaldy, ol joly Mysyrdyń burynǵy prezıdenti Muhammed Mýrsı Túrkııaǵa kelgen.

Ankara men Kaır arasyndaǵy qarym-qatynas 2013 jyly Egıpettiń qazirgi prezıdenti, sol kezdegi armııa basshysy Abdel Fattah ál-Sısı Túrkııanyń odaqtasy retinde qarastyrylǵan «Musylman baýyrlar» qozǵalysynyń jetekshisi Muhammed Mýrsıdi taqtan taıdyrǵannan keıin kúrt nasharlady.

2013 jyly eki el de elshilerin keri shaqyrdy. 2021 jyldyń naýryz aıynda Túrkııa Syrtqy ister mınıstrligi Mysyr elimen dıplomatııalyq deńgeıde baılanystardy qalpyna keltiretinin habarlady. 2023 jyldyń shildesinde eki el de Ankara men Kaırde elshilerdi taǵaıyndaý arqyly dıplomatııalyq qarym-qatynastardy tolyǵymen qalpyna keltirdi.