Mıshlen juldyzdaryn daıyndaıtyn bilim baǵdarlamasy Almatyda engizilýi múmkin

<p>ALMATY. KAZINFORM &ndash; Almatyǵa jumys saparymen kelgen belgili frantsýz aspazdyq mektebiniń ókilderi megapolıstiń joǵary oqý oryndarymen birlesip jumys isteý máselesin talqylady. Eýropalyq delegatsııa Ońtústik astanaǵa Almaty qalasy týrızm basqarmasynyń shaqyrýymen keldi.&nbsp;</p>

Frantsýz mektebi delegatsııasy Almatyda úshinshi ret ótetin Almaty Food Fest halyqaralyq gastronomııalyq festıvaline daıyndyq aıasynda shaqyrylǵan.

Ecole Lenôtre mektebiniń damytý jónindegi dırektory Jan Per Alba meıramhana isi jáne qyzmet kórsetý kafedralary bar qazaqstandyq oqý oryndarymen tanysyp, frantsýzdyq oqytý ádistemelerin qazaqstandyq bilim berý baǵdarlamalaryna engizý múmkindikteri bar ekenin aıtty. 

– Almaty – geografııalyq ornalasýy jaǵynan da, álem halyqtarynyń túrli taǵamdary boıynsha da biregeı qala. Men jergilikti aspazdar men kondıterlerdiń halyqaralyq aspazdyq tájirıbeden shabyttanǵanyn jáne Ulttyq gastronomııalyq talǵamdardy qurmetteıtinin atap ótkim keledi. Bul múmkindik birlesken bilim berý baǵdarlamalaryn jáne iskerlik yntymaqtastyqtyń ártúrli formattaryn iske qosýǵa qyzmet etýi múmkin. Biz óz bilimimizdi Almaty qalasynyń meıramhana bıznesiniń mamandarymen bólisýge tyrysamyz, - dedi Jan Per Alba.

Aıta keteıik, Ecole Lenôtre – 1971 jyly Parıjde ashylǵan aspazdar men kondıterlerdi daıarlaıtyn kásiptik mektep. Bul mektepte jyl saıyn 3 myńnan astam tálimger aspazdyq ónerdi úırenedi. Al onyń kóptegen túlegi Michelin juldyzynyń ıegeri atanǵan.

– Almaty gastronomııalyq týrızm men baı mádenı mura arqasynda tez tanymal bolyp keledi. Ecole Lenôtre sapary - bul bizdiń qala úshin mańyzdy oqıǵa. Bul meıramhana salasyndaǵy bilim berý standarttaryn damytý men jaqsartýdaǵy mańyzdy qadam bolmaq. Sonymen qatar, bul halyqaralyq qaýymdastyqtyń jergilikti taǵamdar men aspazdyq dástúrlerdi baıytýmen qatar ártúrli ulttyq jáne mádenı erekshelikterimen tanysýyna yqpal etedi, - dep habarlady Almaty qalasynyń týrızm basqarmasynan.