Mırzıeev Aral óńirinde Klımattyq tehnologııalardyń halyqaralyq ekspo-habyn qurýdy usyndy

<p>Aral óńirin ekologııalyq daǵdarys aımaǵynan ınnovatsııa, tehnologııa jáne jańa múmkindikter aımaǵyna aınaldyrýǵa nıettimiz. Mundaı bastamany Dýbaıda ótken BUU-nyń Klımattyń ózgerýi jónindegi konferentsııasynyń sessııasynda Ózbekstan prezıdenti kóterdi. Bul týraly <a href="https://kaz.inform.kz/" target="_blank" rel="noopener">Kazinform</a> <a href="https://president.uz/ru/lists/view/6897" target="_blank" rel="noopener">president.uz</a>-ge silteme jasap habarlady.&nbsp;</p>

Shavkat Mırzıeev sóz basynda klımattyń ózgerýi ornyqty damý jolyndaǵy eń mańyzdy qater bolyp otyrǵanyn aıta kele Aral qasiretiniń saldaryna erekshe toqtaldy. 

«Klımattyń ózgerýinen bolǵan teris saldar Ortalyq Azııada qatty seziledi. Bul ásirese Aral tragedııasyna baılanysty. Bizdiń óńirdegi aýa temperatýrasynyń ósýi álemdik ortasha kórsetkishten 2 ese joǵary. Óte ystyq kúnder sany 2 ese ósti, muzdyqtar massıvteriniń 3/1-i eridi. Topyraqtyń qunarsyzdanýy 30 mıllıonnan astam adamnyń ómirine teris áser etip otyr. Shańdy daýyldar jıiledi», - dedi Mırzıeev. 

Ózbekstan prezıdenti bul máseleni sheshý maqsatynda Aral óńirin daǵdarys aımaǵynan damyǵan aýmaqqa aınaldyrý bastamasyn usyndy. 

«Biz Parıj kelisimi aıasynda klımattyń ózgerýine beıimdelý salasyndaǵy jahandyq negizdemelik mehanızmdi jedel arada kelisýdi qoldaımyz. Klımat boıynsha Ortalyq Azııa dıalogy platformasynda beıimdelý strategııasyn ázirleımiz. Sondaı-aq keshe qabyldanǵan «shyǵyn men zalal» qoryn qurý týraly mańyzdy sheshimdi joǵary baǵalaımyz. BUU Bas Assambleıasynyń qarary negizinde biz Aral óńirin ekologııalyq daǵdarys aımaǵynan ınnovatsııa, tehnologııa jáne jańa múmkindikter aımaǵyna aınaldyrýǵa nıettimiz. Osyǵan baılanysty munda Klımattyq tehnologııalardyń halyqaralyq ekspo-habyn qurý boıynsha tyǵyz yntymaqtastyqqa shaqyramyn», - dep bastama kóterdi Ózbekstan basshysy.

Shavkat Mırzıeev tómen kómirtekti ekonomıkaǵa jahandyq deńgeıde kóshý máselesin de nazardan tys qaldyrmaý qajet ekenin jetkizdi. Bul rette damýshy elderdiń múddelerin eskerý mańyzdy. Onyń aıtýynsha, atalǵan tóńirektegi usynystar «Úlken jetilik» (G7) jáne «Úlken jıyrmalyq» (G20) formattarynda turaqty negizde qaralǵany jón. 

Sóz sońynda Mırzıeev Birikken Ulttar Uıymymen birlesip, 2024 jyly Ózbekstanda «Klımattyq kóshi-qon» taqyrybynda konferentsııa ótkizý josparlanǵanyn jarııa etti.