Mırlan Qyzylov: Memlekettegi arzan polıtsııa, qoǵamǵa qymbat túsetinin damyǵan elder jaqsy biledi

QARAǴANDY. QazAqparat – Zapastaǵy polıtsııa general-maıory, zań ǵylymdarynyń kandıdaty, professor Mırlan Qyzylov QR Prezıdenti Qasym-Jomart Toqaevtyń 11 qańtarda Pralament Májilisiniń otyrysynda sóılegen sózin muqııat tyńdaǵanyn aıtýda. Bul rette ol Memleket basshysynyń quqyq qorǵaý organdarynyń áleýetin nyǵaıtý kerektigi týraly tapsyrmalaryna pikirin bildirdi, dep habarlaıdy QazAqparat tilshisi.

Qasym-Jomart Toqaevtyń Parlament Májilisiniń otyrysynda sóılegen sózinde: «Búgin, sol qaraly kúnder artta qalǵan kezde, Іshki ister mınıstrliginiń arnaıy jasaqtarynyń terrorıstik agressııanyń betin qaıtarýdaǵy erligin atap ótkim keledi. ...Biraq bári birdeı óziniń boryshyna adaldyq tanytqan joq.

...quqyq qorǵaý júıesin reformalaýǵa shuǵyl túzetýler engizý qajet... ...Polıtseılerdiń quqyqtyq qorǵalýyn arttyrý. Bılik ókilderine shabýyl jasaý men zańǵa baǵynbaıtyndar úshin jaýapkershilikti kúsheıtý qajet», - dedi.

Zapastaǵy general-maıor Mırlan Qyzylovtyń pikirinshe, Qazaqstan Respýblıkasynyń «Quqyq qorǵaý qyzmeti týraly» Zańynda quqyq qorǵaý qyzmetkerleriniń quqyqtary shekteýli. Qazirgi ýaqyt bul zańdy jetildirýdi talap etedi.

«Keshegi halyq uıymdastyrǵan beıbit jınalystyń sońy jappaı tártipsizdikke ulasyp, egemendigimiz ben Táýelsizdigimizge qater tóndi. Onda jan peıilimen qorǵap, Qazaqstan halqyna naǵyz qyzmet etetin polıtsııa qyzmetkerleriniń erligi men janqııarlyq is- áreketteriniń kýási boldyq.

Ókinishtisi, beıbit zamanda polıtsııa qyzmetkerleriniń qyzmet babynda qaıtys bolý jaǵdaılary taǵy oryn aldy.

Nege ózin qorǵaı almady? Zań osal ma? Álde daıyndyq tómen be?

Shet elderdiń tájirıbesi deımiz. Kórshi Reseı Federatsııasynyń «Polıtsııa týraly» Zańynyń 24 babynda «Qarýlanǵan polıtsııa qyzmetkeriniń jeke qaýipsizdik kepildikteri» degen quqyqtyq norma bar. Onda zańda kózdelgen jaǵdaılar týyndaıtyn bolsa, polıtsııa qyzmetkeri atys qarýyn qoldanýǵa quqyly. Bizdiń «Quqyq qorǵaý qyzmeti týraly» Qazaqstan Respýblıkasynyń 2011 jylǵy 6 qańtardaǵy Zańy mundaı kepildikterdi bermeıdi.

Bul da Prezıdent ataǵan másele. Demek, polıtseılerdiń quqyqtyq qorǵalýynda, bılik ókilderine shabýyl jasaý men zańǵa baǵynbaıtyndar úshin jaýapkershilikti kúsheıtýde negizge alynatyn birden-bir jaıt.

Bizde ІІM arnaýly oqý ornynda 4 jyl oqıtyn kýrsanttyń qyzmettik qarýdy atýǵa daǵdylanýyna, shamamen «Makarov» tapanshasymen – 513, al «Kalashnıkov» avtomatymen nebári 243 oq beriledi... 3 aı men 6 aılyq alǵashqy kásibı daıyndyǵynda qansha oq-dári jumsalatyny belgili. Budan shyǵatyn qorytyndy jalǵyz-aq. Ol polıtsııa qyzmetkeri tıisti kásibı biliktilik ıelenbeıdi. Polıtsııanyń ýchaskelik ınspektor men qylmystyq quqyq buzýshylyqtardyń aldyn alý, ashý jáne jolyn kesýmen aınalysatyn jedel ýákilderdi daıyndaý merziminiń qysqartylýyna qarsymyn», - deıdi Mırlan Qyzylov.

Onyń aıtýynsha, «memlekettegi arzan polıtsııa, qoǵamǵa qymbat túsedi» degen burynnan belgili erejeni damyǵan elder jaqsy túsinedi.

«Sapasyz, beıindik baǵyty ishki ister organdary qyzmetine baǵyttalmaǵan, memlekettiń tapsyrysymen oqytylmaǵan, óz qarajattarymen bilim alǵandardyń polıtsııanyń qyzmet baǵyttaryna qyzmetke qabyldaýǵa jol ashtyq. Bul sátti vedomstvalyq bilimdi jańǵyrtý emes, ólsheýi qymbatqa túsetin, ókinishti sheshim. Adamnyń janyn emdeıtin maman-dárigerdi 9 jylǵa jýyq daıyndaımyz, al qoǵam men meleketttegi quqyqbuzýshylyq dertine baǵa beretin polıtsııanyń ýchaskelik ınspektory men jedel qyzmetkedi 3-6 aı aǵashtan músin jasaǵandaı qyrnap shaǵarýymyz nege ákep soqqanyn «Qasiretti qańtar» dáleldegen shyǵar», - deıdi polıtsııa general-maıory.