Mınskte ál-Farabı atyndaǵy qazaq synyby ashyldy
Ashylý saltanatyna Qazaqstan Respýblıkasynyń Belarýs Respýblıkasyndaǵy Tótenshe jáne Ókiletti Elshisi Asqar Beısenbaev, Zavod aýdany ákimshiliginiń basshysy Sergeı Maslıak, beınekonferentsııa formatynda – «Otandastar qory» KeAQ Vıtse-prezıdenti Maǵaýııa Sarbasov jáne «Otandastar qory» KeAQ Prezıdentiniń keńesshisi Bolat Dıdar qatysty.
Elshi Qazaqstannyń Belarýstegi Elshiligi «Otandastar qorymen» birlesip qazaq tilin, ádebıeti men tarıhyn oqytý kabınetin ashý boıynsha iske asyrylǵan jańa joba týraly aıtyp berdi. Onyń jaıy qaıta jóndeýden ótti, dızaındy qosa alǵanda onda barlyǵy Qazaqstan men Belarýstiń ózara dostyǵy men yntymaqtastyǵy ıdeıasyna baǵynady. Qazaq tilin, Qazaqstan tarıhy men ádebıetin oqyp-úırený asa qyzyqty jáne tıimdi bolýy úshin qazaqstandyq tarap mektepke keń formatty teledıdar, ınteraktıvti oqýlyqtar, sózdikter, tanymdyq ádebıetter syılady.
«Otandastar qorynyń» Vıtse-prezıdenti M. Sarbasov qazaq tilin onlaın oqytý jobasyna bastaý berdi. Alǵashqy sabaqty qazaq tili oqytýshysy, «QazWrite» jobasynyń avtory Aına Alpysbaı ótkizdi. «QazWrite» jobasyn iske asyrýdyń nátıjesinde qazaq dıasporasynyń ókilderi, bıznesmender, álemniń túrli elderindegi qarapaıym adamdar qazaq tilin qashyqtyqtan oqýǵa múmkindik aldy.
Sondaı-aq, qonaqtar mektep oqýshylary 50-den astam sýret pen qolóner buıymdaryn, al kishi synyp oqýshylary mýltımedııalyq prezentatsııalardy usynǵan «Biz ár túrlimiz, biraq birgemiz» atty kórkemóner kórmesine qatysty.
Dástúr boıynsha kórme jyl sońynda Qazaqstan Respýblıkasynyń Táýelsizdik kúnine oraı uıymdastyrylǵan «Men Qazaqstan týraly ne bilemin?» baıqaýy aıasynda ótkiziledi. Sonymen birge, «Qazaqstan-Belarýs» mánerlep oqý baıqaýy aıasynda oqýshylardyń daıyndaǵan poetıkalyq týyndylaryn, sonyń ishinde avtorlyq shyǵarmalardy tyńdaý, sondaı-aq joǵary synyp oqýshylary jazǵan ǵylymı referattardy qorǵaý ótti.