Mınskige shuǵyl qonǵan «Afıny-Vılnıýs» ushaǵynan bomba tabylmady

MINSK. BELTA-QazAqparat – «Afıny-Vılnıýs» reısin oryndap kele jatqan Ryanair kompanııasynyń ushaǵynan jarylǵysh zat tabylmady. Ushaq shuǵyl túrde Mınskiniń Ulttyq áýejaıyna qonǵan bolatyn. QazAqparat bul týraly BELTA agenttigine silteme jasap habarlaıdy.

«Tergeý málimeti boıynsha, 23 mamyr kúni kúndiz «Afıny-Vılnıýs» baǵytyndaǵy reısti oryndap kele jatqan ushaqqa jarylǵysh zat qoıylǵany jóninde aqparat tústi. Alynǵan málimetti tekserý úshin ushaq Mınskiniń Ulttyq áýejaıyna qondy.

Oqıǵa ornyna saperlik-pırotehnıkalyq top jáne shuǵyl-tergeý toby jóneltildi. Jarylǵysh zattar tabylmady.

Tergeý komıtetiniń Oktıabr aýdandyq bólimi Qylmystyq kodekstiń 340-baby, 1-bóligimen (qaýip-qater týraly kórineý jalǵan habarlaý) qylmystyq is qozǵady», - delingen agenttik aqparatynda.

«Saǵat 17.45-tegi (Nur-Sultan ýaqytymen 20.45) jaǵdaı boıynsha, ushaq áli de Mınskiniń Ulttyq áýejaıynda tur jáne ushyp shyǵýǵa daıyndalýda», - dep qosymsha habarlady BELTA.

Áýe kemesiniń bortynda 123 jolaýshy bolǵan. Olardyń barlyǵy avıatsııalyq qaýipsizdikke qatysty qosymsha tekserýden ótip, odan arǵy sharalar úshin áýejaıdyń tranzıttik aılaǵyna jetkizildi. Jolaýshylardyń júgi de reısten túsirilip, qosymsha tekserildi.

Nur-Sultan ýaqytymen 21.35-te habarlanǵandaı, «jolaýshylar tolyq tekserýden ótti. Júk bortqa tıelip jatyr. Ryanair ushaǵy áýege kóterilýge daıyndalýda».