Mınskidegi Halyqaralyq «Kitap óneri» baıqaýynda qazaqstandyq baspagerler bas júldege ıe boldy

ASTANA. 3 maýsym. QazAqparat - Belarýs astanasy Mınsk qalasynda ótken Halyqaralyq «Kitap óneri» baıqaýy TMD-daǵy 11 memleket ókilderiniń basyn qosty. Mamandardyń baǵasyna qulaq túrsek, jyl ozǵan saıyn Dostastyq elderiniń kitap keńistiginde bul baıqaýdyń bedeli artyp keledi. Baspagerlik jetistikterin kópshilikke tanymal etýge qomaqty úles qosatyn osy sharanyń jalpy kitap óndirisin damytýǵa da septigi mol.

Birtalaı jyldan beri respýblıkamyzdyń eń úzdik basylymdarynyń qatarynan laıyqty ornyn menshiktep kele jatqan astanalyq «Folıant» baspasy osy baıqaý qorytyndysynda iri tabysqa qol jetkizip, eki birdeı bedeldi marapatqa ıe boldy.

Merzimdik basylym, kitap shyǵarý, kitap taratý jáne polıgrafııa salasyndaǵy yntymaqtastyq jónindegi memleketaralyq keńestiń beldi de bedeldi qazylary negizgi «Dostastyq» atalymynda jeńisti «Folıant» baspasy qazaq, orys jáne aǵylshyn tilderinde shyǵarǵan «Qazaqstan - Reseı: máńgi dostyq jolymen. Kazahstan - Rossııa: dorogoı vechnoı drýjby. Kazakhstan - Russia: Road of Eternal Friendship» kitap-albomyna baılady.

Byltyr Pavlodar oblysynda eki memleket prezıdentteriniń qatysýymen ótken Reseı men Qazaqstannyń ІH Óńiraralyq yntymaqtastyq forýmyna oraı aımaq basshylyǵynyń qoldaýymen jaryq kórgen bul kitap eki eldiń kóptegen óńirlerine birden tarap ketti. Basylym avtory - belgili qazaqstandyq jýrnalıst, jazýshy Anatolıı Gýrskıı. Naqyshty bezendirilgen kitap betterinde eki egemen memlekettiń túbegeıli jańa áriptestiginiń jıyrma jyldaǵy qarqyndy damýy kórinis tapqan. Naqty tarıhı, qoǵamdyq-ekonomıkalyq mysaldar negizinde memleketter qarym-qatynasynyń basty ári daýsyz máni - qazaq jáne orys halyqtarynyń dostyǵy men baýyrlastyq yqpaldastyǵy aıqyn kórsetiledi.

«ARTknıga» atalymynda ekinshi orynǵa «Folıant» baspasy men túrki órkenıetiniń jalpy adamzat órkenıetindegi roli men ornyn zertteıtin, iri halyqaralyq ǵylymı ortalyq bolyp tabylatyn Halyqaralyq túrki akademııasy (Astana qalasy) birlesip jaryqqa shyǵarǵan «Túrki dúnıesi. Turkic World» almanahy laıyqty dep tanyldy. Jeti tildegi irgeli ǵylymı-kópshilik basylym retinde tanylǵan almanahta dúnıe júzindegi jetekshi túrkitanýshy ǵalymdardyń zertteý materıaldary, belgili jazýshylardyń, memleket jáne qoǵam qaıratkerleriniń maqalalary, túrki áleminiń baı tarıhı-mádenı murasyna, ótkeni men búginine, keleshektegi damýyna arnalǵan maqalalary jarııalanǵan. Erekshe naqyshpen kórkem bezendirilgen «Túrki dúnıesi. Turkic World» almanahy respýblıkalyq kitap qoryndaǵy qazynalar qatarynan oryn alatyny daýsyz.

Baıqaý talaptary boıynsha, laýreat atanǵan kitaptar bıylǵy qyrkúıekte Máskeý qalasynda ótetin 26 Halyqaralyq kitap kórme-jármeńkesiniń arnaıy ekspozıtsııasyna qoıylady, sodan keıin TMD Tarıh murajaıynyń kitap qoryn baıytý maqsatynda Dostastyqtyń Atqarýshy komıtetine tapsyrylady. Baıqaý dıplomdaryn saltanatty tapsyrý rásimi de osy kórme-jármeńkede ótkizilmek.