Mınskide TMD kınematografııasynyń ahýaly talqylanady

ASTANA. QazAqparat - 2018 jyldyń 13-14 naýryzynda Mınskidegi TMD Atqarý komıtetinde TMD-ǵa qatysýshy elder kınematografııasy boıynsha jumys tobynyń otyrysy ótedi, dep habarlaıdy «QazAqparat» HAA Dostastyq Atqarý komıtetiniń baspasóz qyzmetine silteme jasap. 

Kezdesýdiń basty maqsaty - kınematografııa salasyndaǵy TMD-da qabyldanǵan kelisimder men sheshimderdiń qoldanylý tıimdiligin baǵalaý jáne osylardy eskere otyryp, olarmen ary qaraı jumys isteý tetigin anyqtaý.

TMD Atqarý komıtetine Ázerbaıjan Respýblıkasynyń Mádenıet jáne týrızm mınıstrliginen, Belarýs Respýblıkasynyń Mádenıet mınıstrliginen, Qyrǵyzstan Respýblıkasy Mádenıet, aqparat jáne týrızm mınıstrliginen, Reseı Federatsııasynyń Mádenıet mınıstrliginen jáne Kınematografıster odaǵy konfederatsııasynan usynys túsip, jumys toby osy usynystardy talqylaıtyn bolady.

Budan bólek, otyrysqa qatysýshylar Dostastyq elderiniń Mınskidegi «Listapad» halyqaralyq kınofestıvaline qatysýyn keńeıtý máselesin talqylaıdy jáne «Belarýsfılm» kınostýdııasynyń jumysymen tanysady.

Aıta keteıik, Kınematografııalyq jumys toby 2011 jyly TMD-ǵa qatysýshy memleketterdiń mádenı yntymaqtastyq jónindegi keńesi aıasynda qurylǵan.