Minsiz qyzmetimen erekshelengen tártip saqshylary marapattaldy

NUR-SULTAN. QazAqparat – Otan qorǵaýshy kúni men Uly Jeńistiń 77 jyldyǵyna oraı, minsiz qyzmetimen erekshelengen polıtseıler jáne Ulttyq ulannyń áskerı qyzmetshileri marapattaldy, dep habarlaıdy QazAqparat Polisia.kz saıtyna silteme jasap.

Atap aıtqanda, QR Prezıdentiniń Jarlyǵymen ishki ister organdarynyń 25 qyzmetkeri memlekettik nagradamen marapattaldy, 8 basshy general shenin aldy. Sondaı-aq, Іshki ister mınıstriniń buıryǵymen 820 qyzmetker túrli marapatqa ıe boldy.

«Er azamat úshin Otan qorǵaýdan artyq qasıetti mindet joq. Ata-babamyz amanat etip qaldyrǵan jerimiz ben eldigimizdi saqtaý - bizdiń basty paryzymyz. Búginde osy amanatty arqalaǵan ishki ister organdarynyń qyzmetkerleri eline aıanbaı eńbek etip keledi. Olardyń tynymsyz qyzmetine Memleket basshysy da joǵary baǵa berdi. Ol - adal eńbek pen antqa berik bolýdyń jemisi», - dedi ishki ister mınıstri Marat Ahmetjanov.

Marapatqa ıe bolǵandardyń qatarynda er adamdy ajaldan aman alyp qalǵan pavlodarlyq polıtsııa qyzmetkerleri Danat Kamalıev pen Baqytjan Muhambetov te bar. Qyzmet barysynda qaýipke bas tikken qos jigitke «Erligi úshin» medali tabystaldy.

«2022 jyldyń naýryz aıynda bizdiń ekıpajǵa órt týraly shaqyrtý tústi. Oqıǵa ornynda 2-qabattaǵy páterdiń órtenip jatqany anyqtaldy. Biz ol jerden esinen tanyp qalǵan azamatty shyǵardyq. Oǵan alǵashqy medıtsınalyq kómek kórsetip, keıin jedel járdem brıgadasyna tapsyrdyq», - deıdi Pavlodar qalalyq patrýldik polıtsııa batalonynyń ınspektory Danat Kamalıev.

«Mundaı sharaǵa birinshi ret qatysyp turmyn. Óte qýanyshtymyn. Jańa generaldardy quttyqtadyq. Basqa óńirlerden kelgen áriptesterimizben tanystyq», - dep áserimen bólisti Pavlodar qalalyq patrýldik polıtsııa batalonynyń ınspektory Baqytjan Muhambetov.

Sharaǵa kámeletke tolmaǵandar isi jónindegi ýchaskelik polıtsııa ınspektory bolǵan marqum Oljas Rysbektiń ata-anasy arnaıy shaqyrtyldy. Ol qaýiptiń aldyn alý úshin kólikti toqtatpaq bolyp, qyzmet barysynda qaza tapty. ІІ dárejeli «Aıbyn» ordeni ata-anasyna tabystaldy.

«Balam mektep bitirgennen ózi osy mamandyqty tańdady. Óz isin óte jaqsy kórdi. Oqys jaǵdaı boldy. Búgin balamnyń eńbegi úshin orden tabystap jatyr», - dedi ınspektordyń anasy Gúlmıra Nildebaeva.

Іs-sharanyń saltanatty bóliminen soń marapattalǵandar men qonaqtar Áskerı-tarıh murajaıyndaǵy jádigerlerden turatyn kóshpeli kórmeni tamashalady. Kórmeni Kóliktegi polıtsııa departamenti uıymdastyrdy.

Buǵan deıin «QazAqparat» tilshisi Qazaqstan armııasynyń 30 jyl ishindegi damý joly týraly saraptama usynǵan bolatyn.