Mınıstrlik sýdy kóleńkeli naryqta satqandardyń isin Bas prokýratýraǵa joldady
Bul týraly vedomstvonyń baspasóz qyzmeti aqparat taratty.
- Jyl basynan beri Sý resýrstary jáne ırrıgatsııa mınıstrliginiń ishki aýdıt departamenti júrgizgen tekseris nátıjesinde 29 tulǵa ákimshilik jaýapkershilikke tartyldy. Bul jumystar sýdyń «kóleńkeli» naryǵymen, sý salasyndaǵy zańsyz árekettermen kúresý jáne tártip pen ashyqtyqty qamtamasyz etý úshin istelip jatyr. Іshki aýdıt departamenti 9 aıda 11 mekemege aýdıtorlyq tekserý júrgizdi, - deıdi mınıstrliktegi qoǵammen baılanys basqarmasynyń sarapshysy Ańsaǵan Ermek.
Mysaly, «Qazsýshar» RMK-nyń Jambyl oblysyndaǵy fılıalyna júrgizilgen tekseris sý resýrstaryn zańsyz paıdalanýdyń 10-ǵa jýyq faktisi men zańsyz sý berý kelisimshartyn anyqtaǵan.
«Aýdıt qorytyndysy boıynsha mekeme basshysy men Asa óndiristik aımaǵynyń basshysy qyzmetinen bosatyldy. Budan bólek, fılıal dırektorynyń orynbasary men Qordaı, Baızaq, Merki óndiristik aımaqtarynyń basshylary qatań sógis túrinde tártiptik jaýapkershilikke tartyldy. Anyqtalǵan barlyq zań buzýshylyqtardyń materıaldary Bas prokýratýraǵa joldandy, - dedi Ańsaǵan Ermek.
Osyǵan deıin Sý resýrstary mınıstrligi bilim berý baǵdarlamasyna jańa mamandyqtardy engizýdi usynǵan edi.