Mınıstrlik magıstratýra men doktorantýraǵa túsýshilerge mańyzdy habarlandyrý jasady
Tirkelý QR ǴJBM Ulttyq testileý ortalyǵynyń app.testcenter.kz saıtynda ótedi. KT-ǵa tirkelý 2024 jylǵy 10 qarashaǵa deıin jalǵasady.
«Shyǵarmashylyq daıyndyqty talap etetin bilim berý baǵdarlamalarynyń toptary boıynsha beıindi magıstratýraǵa túsýshilerden qujattardy qabyldaý osy jylǵy 28 qazan men 10 qarasha aralyǵynda joǵary jáne (nemese) joǵary oqý ornynan keıingi bilim berý uıymdarymen júzege asyrylady. Testileýdiń ózi qarasha-jeltoqsan aılarynda ótedi. Ótinish berý kezinde túsýshi testileýdi tapsyrý qalasyn óz erkimen tańdaıdy. Túsýshiler ótinishterdi qabyldaý merzimi aıaqtalǵanǵa deıin (10 qarashaǵa deıin) bilim berý baǵdarlamalarynyń toby, tili jáne testileýdi tapsyrý qalasyn ózgertý boıynsha ótinishke ózgerister engize alady. Testileýdi ótkizý kúni týraly aqparat oqýǵa túsýshiniń jeke kabınetinde 13 qarashada qoljetimdi bolady», - delingen mınıstrlik habarlamasynda.
Ǵylymı-pedagogıkalyq magıstratýraǵa túsý úshin keshendi testileý elektrondyq formatta ótkiziledi jáne úsh bólimnen turady: shet tili boıynsha test, oqýǵa daıyndyǵyn anyqtaýǵa arnalǵan test jáne bilim berý baǵdarlamalary tobynyń beıini boıynsha test. Shekti ball – 75 ball.
Al beıindi magıstratýraǵa túsýge nıetti túsýshiler bilim berý baǵdarlamalary tobynyń beıini boıynsha test tapsyrady. Shekti ball keminde 30 ball, onyń ishinde árbir beıindi pán boıynsha keminde 7 ball.
Doktorantýraǵa túsý emtıhanyna tirkelý 2024 jylǵy 10 qarashaǵa deıin jalǵasady. Doktorantýraǵa túsýshiler DTE-ge qatysý úshin ótinish bergenge deıin joǵary jáne (nemese) joǵary oqý ornynan keıingi bilim berý uıymdarynyń qabyldaý komıssııasyna qujattardy tapsyrýy qajet.
Doktorantýraǵa túsý úshin QAZTEST júıesi boıynsha memlekettik tildi meńgergenin rastaıtyn sertıfıkat jáne shet tilin meńgergenin rastaıtyn sertıfıkat usyný qajet. TOEFL ITP sertıfıkaty bar tulǵalar DTE bastalǵanǵa deıin aǵylshyn tilin bilýge arnalǵan qosymsha testileýdi tapsyrady.
Túsý emtıhany qarasha-jeltoqsan aılarynda ótedi.
Eger túsýshige berilgen ótinishke (testileýdi tapsyrý qalasy, bilim berý baǵdarlamalarynyń toby) ózgerister engizý qajet bolǵan jaǵdaıda, oǵan ótinishterdi qabyldaý bazasy jabylǵanǵa deıin (10 qarashaǵa deıin) ótinishti óńdeýge nemese óshirýge múmkindik beriledi. Qosymsha testileýdi ótkizý orny, kúni men ýaqyty týraly aqparat túsýshiniń jeke kabınetinde osy jylǵy 12 qarashada, túsý emtıhany boıynsha aqparat 21 qarashada qoljetimdi bolady.
Fılosofııa doktorlary (RhD) baǵdarlamasy boıynsha doktorantýraǵa túsý emtıhanyna áńgimelesý, esse jazý jáne bilim berý baǵdarlamasy tobynyń beıini boıynsha emtıhan kiredi. Beıini boıynsha doktorlar baǵdarlamasy boıynsha doktorantýraǵa túsý emtıhany áńgimelesý jáne bilim berý baǵdarlamalary tobynyń beıini boıynsha emtıhan suraqtary bólimderinen turady. Memlekettik bilim berý tapsyrysy boıynsha fılosofııa doktorlary (RhD) baǵdarlamasy boıynsha doktorantýraǵa bilim alý úshin túsý emtıhanynan keminde 75 ball, beıini boıynsha doktorlar baǵdarlamasy boıynsha doktorantýraǵa – keminde 50 ball jınaǵan tulǵalar konkýrstyq negizde qabyldanady.
Buǵan deıin Astana qalasynda QAZTEST elektrondy sertıfıkattyq testileýi bastalǵanyn jazǵan bolatynbyz.