Mınıstrlik qaterli isikti emdeýge baǵyttalǵan bıýdjet qarajatyna túsinik berdi

<p>ASTANA. KAZINFORM &ndash; Qazaqstan Respýblıkasy Densaýlyq saqtaý vıtse-mınıstri Erjan Nurlybaev qaterli isikti emdeýge baǵyttalǵan bıýdjet qarajatyna qatysty túsinik berdi.</p>

Búgin Úkimet otyrysynan keıingi baspasóz máslıhatynda «2025-2027 jyldarǵa arnalǵan bıýdjette onkologııalyq aýrýy bar adamdarǵa dári-dármek boıynsha bólinetin qarajat azaıdy ma?» degen suraq qoıyldy.

Óz kezeginde E. Nurlybaev qaterli isik aýrýyna shaldyqqan naýqastardy dári-dármekpen qamtamasyz etý óte mańyzdy másele ekenin atap ótti. 

«Óıtkeni dáriniń jetkilikti bolýy emdeý sapasy men ómir súrý uzaqtyǵyna tikeleı áser etedi. Atap aıtqanda, dárilik preparattarǵa qatysty ótinim naqty dıspanserlik esepte turǵan naýqastar tizimi boıynsha qurylady. Sonymen qatar, jańa patsıentterdiń paıda bolatynyn eskere otyryp, qosymsha kólemge ótinim joldanady. Jyl saıyn patsıentter sany 20 myńnan astam adamǵa ósedi. Sondyqtan bul baǵyttaǵy jumystar aıtarlyqtaı kúrdeli. Qazirgi kezde «SQ-Farmatsııa» dári-dármektiń taýsylmaıtyn kólemin qalyptastyrý jumysyn pysyqtady, onyń ishinde onkologııalyq preparattar da eskerilgen», - dedi vıtse-mınıstr. 

Onyń aıtýynsha, keler jyldarǵa arnalǵan bıýdjette dári-dármekke bólinetin qarajat somasy saqtalady.

«Bıýdjet kem degende 2024 jyldyń deńgeıinde saqtalady. Bul turǵyda onkologııalyq aýrýlardy emdeýge arnalǵan bıýdjet azaımaıdy. Sondaı-aq dárilik preparattarmen qamtamasyz etý baǵytynda qarajat qysqarmaıdy. 2025 jyly bıýdjetti naqtylaý baǵytynda Qarjy mınıstrligine júgine alamyz. Sol kezde osy salaǵa bólinetin qarajat somasyn kóbeıtýdi suraı alamyz, ıaǵnı bul múmkindikti mindetti túrde paıdalanamyz», - dedi Erjan Nurlybaev.

Aıta keteıik, Qazaqstanda onkologııalyq aýrýlardy emdeýge bólinetin qarjy qysqartylmaıtyn boldy. Kerisinshe, bul salaǵa qosymsha 25 mlrd teńge bólinedi.

Eske sala keteıik, bıyl qańtarda qazaqstandyq bıotehnolog Dos Sarbasov qaterli isikke qarsy preparat jasap shyǵarǵany týraly habarlaǵan edik. Innovatsııalyq dárini aldymen qoıandar men tyshqandarǵa synaǵan, sosyn onkologııa ýnıversıtetinde 15 adam synaqtyń birinshi kezeńinen ótken. 
1 shildede qaterli isikke qarsy qazaqstandyq preparatty synaqtan ótkizýdiń ekinshi kezeńi bastaldy.