Mınıstrliktiń qatysýyn talap etetin máselelerdiń sheshiletin kúni alys emes - Ashat Oralov

ALMATY. QazAqparat - Almatyǵa jumys saparymen Premer-mınıstrdiń orynbasary Altaı Kólginov pen Mádenıet jáne sport mınıstri Ashat Oralov keldi. Bul týraly Ashat Oralov Facebook paraqshasynda jazdy, dep habarlaıdy QazAqparat tilshisi

Ashat Oralovtyń sózinshe, Premer-mınıstrdiń orynbasary Altaı Kólginovpen mádenıet uıymdaryn aralady.

Sondaı-aq kezdesýdiń qorytyndysy boıynsha mınıstrliktiń qatysýyn talap etetin máselelerdiń sheshiletin kún alys emes ekenin málimdedi.

«M.Áýezov atyndaǵy Qazaq ulttyq drama teatrynyń jumysymen tanystym. Asanáli Áshimov, Tuńǵyshbaı Jamanqulov, Murat Áýezov syndy mádenıet jáne óner qaıratkerlerimen jáne basqa da belgili sala maıtalmandarymen kezdesý ótkizdim. Kezdesýde aıtylǵan máselelerdi sheshý úshin barlyq qajetti jumystardy júrgizetin bolamyz: materıaldyq-tehnıkalyq jaraqtandyrý, qyzmetkerlerdiń eńbekaqysy jáne t.b.

Áıgili teatr ǵımaratyn qalpyna keltirý boıynsha daıyndyq jumystarynyń barysyn zerdeledik.

Odan keıin Abaı atyndaǵy Qazaq ulttyq opera jáne balet teatrynda boldym.

Mýzykanttarmen, balet trýppasymen, tigin tsehteriniń qyzmetkerlerimen kezdesip teatrdyń ishki ómirimen tanystym.

Almaty qalasyndaǵy T.Júrgenov atyndaǵy Qazaq ulttyq óner akademııasynyń oqytýshylarmen de kezdestim. Basqosýda aıtylǵan usynys-pikirlerdi muqııat tyńdap nazarǵa aldyq.

Sonymen qatar, zaǵıp jáne nashar kóretin azamattarǵa arnalǵan respýblıkalyq kitaphanaǵa bardym.

Mınıstrliktiń qatysýyn talap etetin máselelerdiń sheshiletin kúni alys emes», - dep jazdy Mádenıet jáne sport mınıstri.