Mınıstrlikter úıi, Parlament pen Úkimet ǵımaratynda bir saǵatqa syrtqy jaryq sóndirildi

NUR-SULTAN. QazAqparat - «Jer saǵaty» jahandyq ekologııalyq aktsııasyn qoldaý maqsatynda Qazaqstan Respýblıkasy Prezıdentiniń Іs Basqarmasy qyzmet kórsetetin Mınıstrlikter úıi, Úkimet úıi, QR Parlament Májilisi men Senat ǵımarattary, Qarjy mınıstrligi, ASPIR jáne Tuńǵysh Prezıdenti murajaıynyń syrtqy jaryqtandyrýy sóndirildi, dep habarlaıdy QazAqparat.

Vedomstvonyń málimetinshe, jer planetasynyń resýrstaryn uqypty paıdalanýǵa shaqyratyn jahandyq fleshmob barlyq kontınette 26 naýryzda jergilikti ýaqyt boıynsha saǵat 20.30-dan 21.30-ǵa deıin ótedi.

Osy ýaqyt ishinde «Jer saǵaty» qatysýshylary óz erkimen elektr qurylǵylary men jaryqtandyrýdy paıdalanýdan bas tartady.

«Jer saǵaty» jobasyn búkil álem boıynsha eki mıllıardqa jýyq adam qoldaıdy. Bizdiń elimiz jahandyq ekologııalyq bastamaǵa 2009 jyly qosyldy.

Qazaqstandaǵy «Jer saǵaty-2022» ekologııalyq týrızm taqyrybyna arnalǵan.

Eske sala keteıik, búgin dúnıejúzilik «Jer saǵaty» aktsııasy ótti. Qazaqstan atalǵan ekologııalyq aktsııaǵa 2009 jyldan bastap qatysyp keledi.

Aqorda «Jer saǵaty» jahandyq aktsııasyn qoldady.