Mınıstrliktegiler Denıs Tenniń ómiri úshin qalaı arpalysqanyn aıtty

ASTANA. QazAqparat - Densaýlyq saqtaý vıtse-mınıstri Lázzat Aqtaeva aýyr jaraqat alǵan Denıs Tendi tasymaldaý kezinde klınıkany tańdaý sheshimine qatysty túsinik berdi, dep habarlaıdy QazAqparat.

Onyń sózine qaraǵanda, Denıske jedel járdem shaqyrý saǵat 14:56-lar kezinde túsken. Sáıkesinshe, bul málimet «S30» retinde belgilendi, ıaǵnı bul adamnyń ómirine qaýipti degendi bildiredi.

Kólik saǵat 14:58-de oqıǵa ornyna attanyp, 10 mınýttan keıin Denıske jetti. Budan keıin jedel járdem saǵat 15:12-ler kezinde ony Ortalyq qalalyq klınıkalyq arýhanaǵa aparýǵa baǵyt alyp, sportshy ol jerge saǵat 15:23-te jetkizildi. 2 saǵat 7 mınýt boıy júrek-ókpe reanımatsııalyq áreketteri jasaldy, alaıda barlyq sharalarǵa qaramastan, saǵat 17:30-da bıologııalyq ólim tirkeldi.

«Naýqasty eń jaqyn ornalasqan klınıkaǵa jetkizý týraly mınıstrdiń buıryǵy bar. Brıgada tolyq medıtsınalyq kómekti kórsetý úshin Ortalyq qalalyq klınıkalyq aýrýhana jaqyn ekenin baǵamdady»,- dedi vıtse-mınıstr.

Sonymen qatar ol shuǵyl-hırýrgııalyq bólimshe Ortalyq qalalyq klınıkalyq aýrýhana da bar ekenin atap ótti.

«Eń bastysy, naýqasty aýrýhanaǵa jetkizý kezinde barlyq reanımatsııalyq is-sharalar jasaldy. Bul ýaqytyly jasalýy tıis áreketter. Sondaı-aq aýrýlardy qabyldaý bólmesi aptasyna jeti kún boıy 24 saǵattyq rejimde jumys isteıtin statsıonarǵa jetkizý óte mańyzdy», - dedi vıtse- mınıstr.

Onyń aıtýynsha, jedel járdem brıgadasy tekserý barysynda Denıs Ten esin bilmeı jatqan. Onyń arterııalyq qysymy da anyqtalmady, ıaǵnı sportshynyń ahýaly klınıkalyq ólim jaǵdaıy retinde baǵalandy.

Denısti aýrýhanaǵa tasymaldaý protsesinde júrek-ókpe reanımatsııasy men ózge de qajetti sharalar jasaldy.