Mınıstrlik jýrnalıstik saýaldarǵa jaýap berý jumysynyń sapasyn qatań baqylaýǵa almaq

ASTANA. QazAqparat - QR Aqparat jáne kommýnıkatsııalar mınıstrligi memlekettik organdardyń jýrnalıstik saýaldarǵa jaýap berý jumysyn qatań baqylaýǵa alatyn bolady, dep xabarlaıdy QazAqparat tilshisi.

Buqaralyq aqparat quraldary salasyndaǵy memlekettik saıasat departamenti dırektorynyń orynbasary Bekzat Raxymovtyń aıtýynsha, búginde jýrnalıstik saýalǵa der kezinde jaýap bermegen laýazymdy tulǵalar tártiptik jazaǵa tartylýy tıis. Atalǵan shara zańda ashyq jazylmasa da, xalyqtyń aryz-shaǵymdaryna jaýap berýge qatysty qyzmettik ınstrýktsııada anyq kórsetilgen. Degenmen, osy ýaqytqa deıin jýrnalıstik saýalǵa jaýap bermegeni úshin tártiptik jazaǵa tartylǵan laýazymdy tulǵalardyń statıstıkasyn eshkim júrgizbegen. Sondyqtan ony arnaıy komıssııanyń aıasynda júrgizý kózdelgen.

«Aldaǵy ýaqytta biz ol statıstıkany jarııalaıtyn bolamyz. Sosyn resmı saýalǵa jaýap bermegeni úshin tek baspasóz xatshysy ǵana tártiptik jazaǵa tartylady dep oılaý durys emes. Baspasóz qyzmeti men resmı ókil saýaldyń ýaqytynda oryndalýyn baqylaıdy. Al sol máselege jaýapty qurylymdardyń moınynda naqty jaýapkershilik bolady», - deıdi Raxymov.

Onyń sózine qaraǵanda, jańa zańnyń aıasynda barlyq memlekettik organdarda buqaralyq aqparat quraldarymen baılanys jasaıtyn resmı ókilderdi bekitý, ıa bolmasa, quziretti qurylymdardy (baspasóz qyzmetteri, qoǵammen baılanys departamentteri - avt.) qurý mindeti qarastyrylǵan.

«Iá, qazirgi kezde barlyq ortalyq memlekettik organdarda ondaı qurylymdar bar. Endigi kezekte, jergilikti jerde osy jumysty jalǵastyrý qajet. Biz óz tarapymyzdan barlyq sharalardy úılestirip otyratyn bolamyz», - deıdi Raxymov.

Aıta keteıik, búginde aqparat jáne kommýnıkatsııalar máseleleri boıynsha ózgerister men tolyqtyrýlar engizý týraly zańǵa qatysty 200-ge jýyq usynys bar. Arnaıy jumys toby osy ózgeristerdiń bárin jan-jaqty zerdelep shyqty.