Mınıstrlik «Jaratylystaný» oqýlyǵynda júrgen bóten vebsaıtqa resmı túsinik berdi
Áleýmettik jeli qoldanýshysynyń aıtýynsha, oqýlyqta berilgen veb-saıt siltemesi bilim resýrsyna emes, úlkenderge arnalǵan (+18) saıtqa alyp barady.
«Atalǵan oqýlyq memlekettik saraptamadan ótip, 2017 jyly orys tilinde oqytatyn mektepterde qoldanýǵa ruqsat berilgen. Osy ýaqytqa deıin oqýlyq mazmunyna qatysty shaǵym túsken joq. §33 «Jasýsha álemine ekskýrsııa» tapsyrmasynda oqýshyǵa jasýsha organoıdtarynyń fýnktsııalaryn ornatý úshin anyqtamalyq derekter men ınternet-resýrstardy paıdalaný usynylady. Saıt yqtımal resýrstardyń biri retinde kórsetilgen biofile.ru saıty oqýlyq saraptamadan ótken kezde «Bıofaıl» ǵylymı-aqparattyq jýrnalynyń veb-saıty bolatyn (saıttyń skrıni bar)», - delingen habarlamada.
Ortalyqtyń aqparatynsha, oqýlyqtaǵy veb-resýrstar balalardyń aqparatty izdeý jáne taldaý daǵdylaryn damytý maqsatynda usynylǵan.
«Tekserý barysynda saıttyń qazirgi ýaqytta jumys istemeıtini anyqtaldy. Biraq, braýzerden saıt ataýyn tergende, izdeý tikeleı kúmándi tanysý saıttaryna qaraı baǵyttaıdy. Muraǵat qyzmeti boıynsha taldaý nátıjesi «web.archive.org» saıttyń 2011 jyldan beri bar ekenin kórsetti, sońǵy jyldary belsendilik kúrt tómendegen. 2023 jyldyń 17 aqpany men 9 naýryzynda saıt ákimshisi usynylmaǵan saıttarǵa baǵyttaıtyn jańa URL resýrsty qosyp qoıǵan (ekran skrıni bar)», - deıdi vedomstvodan.
Sondaı-aq, bilim alýshylardyń aqparattyq qaýipsizdigin qamtamasyz etý maqsatynda ortalyq quqyq qorǵaý jáne basqa da memlekettik organdarǵa tıisti suraý salatynyn habarlady.
Sonymen qatar, baspalarmen birlesip barlyq oqýlyqtardaǵy veb-saıttarǵa tekserý júrgizilip, pedagogtar men ata-analarǵa tıisti nusqaýlyq hat jasalady.
Oqý-aǵartý mınıstrligi istiń mán-jaıy tekserilip, kinálilerdiń jaýapqa tartylatynyn málim etti.