Mınıstrlik janynan jerge zertteý júrgizetin memlekettik ınstıtýt qurylmaq

ASTANA. QazAqparat – Aýyl sharýashylyǵy mınıstrliginiń janynan jerge ekonomıkalyq baǵalaý júrgizip, oǵan monıtorıng jasaıtyn ınstıtýt qurylýy múmkin. Bul týraly Ashyq NQA portalynda jarııalanǵan Úkimet qaýlysynyń jobasynda jazylǵan, dep habarlaıdy QazAqparat tilshisi.

«Aýyl sharýashylyǵy mınıstrligi Jer resýrstaryn basqarý komıtetiniń «Jerlerge zerttep - qaraý jumystaryn júrgizý jónindegi memlekettik ınstıtýt» sharýashylyq júrgizý quqyǵyndaǵy respýblıkalyq memlekettik kásiporny qurylsyn. Kásiporynnyń mindeti – jerdi ekonomıkalyq baǵalaý, oǵan monıtorıng júrgizý, topyraqty zertteý, geobotanıkalyq, agrohımııalyq zertteýlerdi jáne topyraqty baǵalaýdy júrgizýdi qamtıtyn jerlerdiń sapasyn esepke alý», - dep jazylǵan Úkimet qaýlysynyń jobasynda.

Sonymen qatar, tıisti qaýlymen Aýyl sharýashylyǵy mınıstrligine tikeleı baǵynatyn myna qurylymdar endi Jer resýrstaryn basqarý komıtetine berilmek:

- Respýblıkalyq agrohımııa qyzmetiniń ǵylymı-ádistemelik ortalyǵy;

- Aımaqtyq gıdrogeologııalyq-melıoratsııalyq ortalyǵy;

- Ońtústik Qazaqstan gıdrogeologııalyq-melıoratsııalyq ekspedıtsııasy;

- Qyzylorda gıdrogeologııalyq-melıoratsııalyq ekspedıtsııasy.

Qaýly 1 shildeden bastap kúshine enedi.