Mınıstrlik vaktsına almaǵan balalar mektepke kirmeıdi degen aqparatqa qatysty túsinik berdi

NUR-SULTAN. QazAqparat – Qazaqstanda vaktsına saldyrmaǵan jasóspirimder mektepke kirgizilmeıdi degen málimetke qatysty elimizdiń Densaýlyq vıtse-mınıstri Ajar Ǵınııat túsinikteme berdi, dep habarlaıdy QazAqparat tilshisi.

«Vaktsınany balalarǵa mindettep salǵyzady dep jatqan ata-analarǵa aıtarym, ýaıymdamańyzdar. Sheshimdi sizder qabyldaısyzdar, eshkim ata-ananyń ruqsatynsyz balaǵa ekpe salmaıdy. Degenmen oılanýǵa shaqyramyz, aldymen balanyń densaýlyǵyn. Osy oraıda men sizderge statıstıkany keltirip keteıin. Búgindi tańda elimiz boıynsha 15 myń bala koronavırýs ınfektsııasynyń orta aýyr jáne aýyr túrine shaldyǵyp, em aldy. Sondaı-aq, 44 bala atalǵan indettiń jeńil túrimen aýyryp shyǵyp, keıin qaıta juqtyrý jaǵdaıy tirkelip otyr. Ókinishtisi sol, balalar koronavırýspen ǵana kúresip jatqan joq, ony juqtyrý saldarynan basqa aýrý túrlerin asqyndyryp alyp jatyr», - dedi Ajar Ǵınııat tanymal telejúrgizýshi Láılá Sultanqyzyna bergen suhbatynda.

Sondaı-aq, vıtse-mınıstr balalarǵa kúshtep nemese mindettep vaktsına salady degenniń qur qaýeset ekenin aıtty.

«Vaktsına almaǵan balalardy mektepke kirgizbeı qoıady degen jalǵan. Bizde ondaı maqsat joq. Búginde elimizde 26 myńnan astam bala ekpe salǵyzdy. Men osy kúnderi birqatar emhana men mektepte boldym, sonda ata-anasymen kelip vaktsına alyp jatqan balalardyń qarasy barshylyq»,- deıdi ol.

Buǵan deıin A. Ǵınııat elimizde jyl basynan beri 25 myń júkti áıeldiń koronavırýs indetine shaldyqqanyn aıtty.