Mınıstrlik tegin dárimen qamtýǵa qatysty halyq shaǵymyn tekserýde

ASTANA. QazAqparat - Densaýlyq saqtaý mınıstrligi dári-dármekpen qamtamasyz etý boıynsha azamattardan túsip jatqan shaǵymdardy óńdeýdi bastady, dep habarlaıdy QazAqparat vedomstvonyń baspasóz qyzmetine silteme jasap.

«Qazirgi tańda memlekettik organnyń elektrondyq poshtasyna dárilik qamtamasyz etýge qatysty 100-den astam shaǵym kelip tústi. Onyń ishinde 46 patsıent óziniń derekterin tolyq kórsetti, bul medıtsınalyq uıymdarmen málimetterdi pysyqtaýǵa múmkindik beredi. Negizinen medıtsınalyq preparattardyń jetispeýshiligi Almaty jáne Astana qalarynda, Shyǵys Qazaqstan oblysynda baıqalady», - delingen baspasóz habarlamasynda.

Kelip túsken ótinishterdi óńdeý kezinde negizdelgen jáne negizdelmegen shaǵymdarǵa taldaý júrgizilýde, sondaı-aq «SQ-Farmatsııanyń» biryńǵaı dıstrıbıýtorynyń qoımalarynda dárilik zattardyń bar-joǵy tekserilýde.

«Odan basqa, ambýlatorııalyq emdeý kezinde azamattardyń tegin dárilik zattarmen qamtamasyz etilmeýine qatysty kelip túsken shaǵymdarǵa baılanysty óńirlerdiń Densaýlyq saqtaý basqarmalaryna 2018 jylǵy qańtar-aqpanda bólingen qosymsha qarjy qarajatynyń esebinen satyp alynǵan dárilik zattarmen halyqty qamtamasyz etýdi qaraý jáne ol  boıynsha sharalar qabyldaý týraly hat jiberildi», - dep atap ótti vedomstvodan.