Mınıstrlik prokýrorlardyń ákimshilik sot isin júrgizýge qatysýyn shekteýdi usyndy

ASTANA. QazAqparat – Ádilet mınıstrligi «QR Ákimshilik ádilet salasyn jetildirý jáne keńeıtý máseleleri boıynsha ózgerister men tolyqtyrýlar engizý týraly» zań jobasynyń tujyrymdamasyn jarııalady, dep habarlaıdy QazAqparat tilshisi.

Ashyq talqyǵa shyǵarylǵan qujatta prokýrorlardyń ákimshilik sot isin júrgizýge qatysýyn shekteıtin norma engizý usynylǵan.

«Germanııa men Latvııada prokýratýra ákimshilik protseske onyń áreketterine shaǵymdanǵan jaǵdaıda ǵana qatysa alady. Osyǵan baılanysty ol talap qoıylǵan memlekettiń nemese zańdy tulǵanyń ókili bola alady. Alaıda prokýratýranyń qandaı da bir qadaǵalaý fýnktsııasyna qatysýǵa nemese oryndaýǵa jalpy quqyǵy joq.

Grýzııanyń ákimshilik zańnamasynda prokýrordyń sot talqylaýyna qatysýy da qarastyrylmaǵan. Grýzııada prokýror ákimshilik-quqyqtyq qatynastardyń qatysýshysy bolyp tabylmaıdy.

Jalpy alǵanda, prokýrordyń qatysýy ákimshilik sot isin júrgizýdiń sıpatyna sáıkes kelmeıtinin túsiný mańyzdy. Onda árqashan álsiz tarap (azamat) kúshti tarappen (memlekettik organ) teńestiriledi», - delingen qujatta.

Osy máselelerdi jáne halyqaralyq tájirıbeni eskere otyryp, Ádilet mınıstrligi prokýrorlardyń ákimshilik sot isin júrgizýge qatysýyn shekteıtin ózgeris engizbek. Vedomstvo boljamyna sáıkes, munyń nátıjesinde shaǵym túsirgen tarap pen jaýap berýshi organdarǵa teń quqyq beriledi.