Mınıstrlik pen «Parasat» ulttyq ǵylymı-tehnologııalyq holdıngi» AQ-nyń ǵylymı zerttemeleriniń ózara úlken is-qımylyn qamtamasyz etý kerek - K. Másimov
Bul týraly búgin Premer-Mınıstr Kárim Másimov Astanada atalǵan holdıngtiń jobalarymen tanysý kezinde aıtty.
«Búgingi keńeste «Parasat» holdıngisindegi jaǵdaımen jáne atqarylyp jatqan baǵyttar boıynsha tanystym. Jalpy jumys baǵyty durys, sondaı-aq alǵa qoıylyp otyrǵan maqsattar oryndalýda»,-dedi Úkimet basshysy.
Osy oraıda K. Másimov júzege asyrylatyn jobalar barynsha qajetti bolýyn, sonymen birge ǵylymı túrde jan-jaqty zerdelengen jobalardy iske qosý kerektigin aıtyp ótti.
Osy turǵyda Premer-Mınıstr Bilim jáne ǵylym mınıstri Janseıit Túımebaevqa «Parasat» holdıngi men Indýstrııa jáne jańa tehnologııalar mınıstrliginiń ózara úlken is-qımylyn qamtamasyz etýdi júktedi.
Úkimet basshysy qazirgi kezde Elbasynyń tapsyrmasy boıynsha údemeli ındýstrııalyq-ınnovatsııalyq damý baǵdarlamasyn iske asyrý naýqany júrip jatqanyn aıta kele, osyǵan baılanysty atalǵan mınıstrlik pen ǵylymı-tehnologııalyq holdıngi qyzmetin jaqyndastyra túsý kerektigin jetkizdi.