Mınıstrlik ókili Grýzııada qaza tapqan qazaqstandyq jýrnalıske qatysty iske pikir bildirdi

ASTANA. QazAqparat – Konsýl Grýzııada qaza tapqan qazaqstandyq jýrnalıstiń týystarymen únemi baılanysta. Bul týraly Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat tilshisi.

«Bizdiń bul máseleden habardarmyz, oqıǵa birneshe aı buryn bolǵan. Ol kezde biz onyń jýrnalıst ekenin múldem bilmedik. Azamatsha atalǵan elge jeke ózi saıahattap barǵan. Onyń kásibı qyzmetine atalǵan oqıǵanyń eshqandaı qatysy joq. Ol qarapaıym Qazaqstan azamaty retinde óziniń tanysymen Grýzııaǵa attanǵan. Grýzııa Іshki ister mınıstrliginiń málimetinshe, qazirgi tańda kúdikti ustaldy. Tergeý sharalary júrip jatyr. Sot sheshimi shyqqan ýaqytta Grýzııa bıligi bizge habar beredi. Ázirge Grýzııa azamaty kúdikti dep tanylyp otyr», - dedi Aıbek Smadııarov.

Vedomstvonyń resmı ókili tergeý protsesine eshkimniń, onyń ishinde marqumnyń jaqyndary da aralaspaıtynyn atap ótti.

«Olar tergeý sharalaryna qatysa almaıdy. Bizdiń elimizde de tergeý is-sharalaryna qatysýǵa ruqsat etilmeıdi. Konsýl marqumnyń týystarymen únemi baılanysta. Biraq sotqa kim qatysatynyn bilmeımin», - dep túıindedi ol.

Buryn habarlaǵanymyzdaı, ótken aıda qazaqstandyq jýrnalıst Janbota Tólegen Grýzııada kisi qolynan qaza tapty.