Mınıstrlik konteınerlik tasymaldan túsetin tabysty eseptep qoıdy

ASTANA. QazAqparat - QR Investıtsııalar jáne damý mınıstrliginiń boljamyna sáıkes, aldaǵy ýaqytta «Qorǵas» arqyly ótetin konteınerlik tasymaldyń kólemi aıtarlyqtaı artady, dep habarlaıdy QazAqparat tilshisi.

«Bıyl «COSCO Shipping» kompanııasy «Qorǵas» arnaıy ekonomıkalyq aımaqtyń 49 paıyzdyq úlesin satyp alǵan bolatyn. Bul degenimiz, Qytaıdan Eýropaǵa baratyn konteınerlerdiń sany artady. Ol jaǵynan COSCO Shipping álemdik kóshbasshy bolyp sanalady. Al ondaı kompanııa bizge, ıaǵnı «Qorǵasqa» kelse, konteınerlik tasymaldyń basym bóligi Qazaqstan arqyly ótedi. Bizdiń esebimizge sáıkes, 2020 jylǵa qaraı tranzıttik tasymaldan jyl saıyn 3-4 mlrd dollar túsedi», - deıdi vıtse-mınıstr Erlan Qaıyrov. 

Aıta keteıik, aldaǵy ýaqytta arnaıy ekonomıkalyq jáne ındýstrııalyq aımaqtarda jerdi berý sharalaryn barynsha ońtaılandyrý josparlanǵan. Osyǵan oraı, búgin QR Investıtsııalar jáne damý vıtse-mınıstri Erlan Qaıyrov Parlament Májilisiniń depýtattaryna arnaıy zań jobasyn tanystyrdy. Al depýtat Baqtııar Máken «Alataý» parkiniń máselesin taǵy kóterdi.