Mınıstrlik kınofılmderdi prokattan ne úshin jáne qalaı almaq

ASTANA. QazAqparat - Qazaqstanda sot sheshiminsiz prokattaǵy fılmdi keri qaıtarýǵa ruqsat berý josparlanyp otyr. Bundaı norma Parlament Májilisiniń jalpy otyrysynda birinshi oqylymda maquldanǵan kınematografııa týraly zań jobasynda qamtylǵan, dep habarlaıdy QazAqparat.

«Eger de fılm prokatqa shyqqanymen, alaıda talaptar oryndalmasa, biz ony prokattan keri qaıtara alamyz. Qazirgi kezde Ádilet mınıstrligi men sýdıalar bul másele boıynsha sotqa júginýdiń qajeti joq ekenin alǵa tartýda. Óıtkeni sot sheshimi shyqqansha, tıisti ýaqyt kerek. Sot birneshe ınstantsııalarda ótýi múmkin. ıAǵnı sot sheshimi shyqqanǵa deıin, bul fılmniń prokaty aıaqtalyp ta qalady», - dedi QR Mádenıet jəne sport mınıstri Arystanbek Muhamedıuly.

Onyń sózine qaraǵanda, bul protsesti jyldamdatý usynylýda. Sondaı-aq prokattyq kýálikti usynǵan organǵa atalǵan qujatty qaıtaryp alý quqyǵyn berý eskerilip otyr.

«Prokatqa shyqqan kezde fılm tıisti talaptarǵa sáıkes bolýy qajet. Máselen, fılmniń hronometrajy 160 mınýtty quraýy kerek. Al keıde hronometrajy úlken fılmder qoıylady. Osyndaı jaǵdaılarda memorgan prokattan qaıtaryp alý quqyǵyna ıe», - dedi vedomstvo basshysy.

Osy oraıda ol sheshimdi sarapshylyq keńes qabyldaıtynyn, onyń quramynda tanymal qoǵam qaıratkerleri, kıno óneriniń mamandary bolatynyn sóz etti.

«Prokatqa shyǵarýshylar qoldanystaǵy normalardy buzbaýǵa tyrysatynyn atap ótken jón. Sebebi olar osy naryqta ary qaraı jumys istegendi qalaıdy. Atalǵan norma erekshe jaǵdaılar úshin jazylǵan», - dep túıdi A. Muhamedıuly.