Mınıstrlik kıik atýǵa ruqsat berýdiń jaı-japsaryn túsindirdi

ASTANA. QazAqparat – Ekologııa jáne tabıǵı resýrstar mınıstrligi ǵylymı maqsatta kıikterdi atýǵa ruqsat berýdiń mán-jaıyn túsindirip ótti, dep habarlaıdy QazAqparat tilshisi.

«Elimizde kıik atýǵa tyıym salynǵaly zertteýler júrgizilgen joq. Olardy qorǵaý jáne ósimin molaıtý maqsatynda keshendi ǵylymı zertteýler júrgizý qajettiligi týyndap otyr. Osyǵan oraı, bıyl Orman sharýashylyǵy jáne janýarlar dúnıesi komıteti ǵylymı uıymdarmen birlesip, kıikterdiń popýlıatsııasyna ǵylymı zertteý júrgizýdi josparlady. Zertteý barysynda atalǵan janýardyń kóbeıýine boljam jasalyp, mekendeý, taralý jáne kóshi-qon aýmaǵy naqtylanady. Sonymen qatar, kıikterdiń qorektený bazasy zerdelenip, aýyl sharýashylyǵyna zalal keltirmeýine qatysty usynystar ázirlenedi», - delingen mınıstrliktiń resmı habarlamasynda.

Osylaısha, bıyl mınıstrlik Zoologııa ınstıtýtymen birlesip kıik atýǵa kvota bólip otyr.

«Kıikterdiń popýlıatsııasy, jynystyq jáne jas erekshelikteri, ólim-jitim kórsetkishi jáne janýarlardyń tirshiligine kedergi keltiretin faktorlarǵa monıtorıng jasalyp, zertteýler júredi. Sol arqyly kıikter sany kóbeıýiniń bıologııalyq jáne tehnologııalyq negizderi ázirlenedi. Sondaı-aq, zertteý júrgizý maqsatynda kıikterdiń tólin tirileı alý kózdelip otyr», - deıdi vedomstvodan.

Kıik atýǵa ruqsat beretin kvota kólemi Zoologııa ınstıtýty, Jáńgirhan atyndaǵy BQO agrotehnıkalyq ýnıversıteti jáne Veterınarııa jónindegi ulttyq referenttik ortalyq sııaqty ǵylymı uıymdardyń ótinimine qaraı belgilenedi. Kvota boıynsha shekteý bar.

Mınıstrliktiń habarlaýynsha, BQO-da kıikterdi saqtaý jáne olardyń ósimin arttyrý baǵytynda ortalyq (pıtomnık) jumys isteıdi.

Eske salaıyq, bıyl 15 aqpannan bastap bir jyl boıy ǵylymı-zertteý jumystary úshin kıikterdi atýǵa ruqsat berilýi múmkin ekenin habarlaǵan edik. Ǵylymı maqsatta Qazaqstannyń 4 oblysy aýmaǵynda 1 815 kıikti atýǵa ruqsat berilmek.