Mınıstrlik QazMunaıGaz ben reseılik kompanııanyń kelisimshartyna qatysty túsinik berdi
Búgin Ortalyq kommýnıkatsııalar qyzmetindegi baspasóz máslıhatynda «Qalamqas-teńiz, Hazar, Áýezov» jer qoınaýy ýchaskesin ıgerýde ne sebepti reseılik serikteske tańdaý túskeni týraly suraq qoıyldy.
Óz kezeginde Ashat Hasenov atalǵan joba aıasynda reseılik kompanııa tıimdi usynys jasaǵanyn jetkizdi.
«Osy oraıda atalǵan kompanııa «QazMunaıGazdyń» strategııalyq seriktesi retinde anyqtaldy. Osy joba aıasynda Qazaqstanǵa qandaı paıda túsedi? Birinshiden, bul ken ornyn ıgerý birazdan beri qarastyrylyp kele jatyr. Kezinde biz ony Kaspıı jobasy boıynsha kelisim aıasynda ıgerýdi josparlaǵan edik. Biraq ekonomıkalyq turǵyda yntalandyrý tetikteri bolmaǵan soń, operator bul jobany memleketke qaıtardy. Sondyqtan tıisti jeńildikter berýdi kózdeıtin jetildirilgen kelisimshart mehanızmi engizildi», - dedi vıtse-mınıstr.
Aıta keteıik, bıyl 9 aqpanda «QazMunaıGaz» UK AQ jáne «Lýkoıl» JAQ Kaspıı teńiziniń Qazaqstan bóligindegi «Qalamqas-teńiz, Hazar, Áýezov» jer qoınaýy ýchaskesin ıgerý jobasy boıynsha birqatar kelisimge qol qoıdy.
Kompanııalar Qatysýshylar kelisimine, «Kalamkas-Khazar Operating» JShS jarǵylyq kapıtalynda 50% qatysý úlesin satyp alý-satý shartyna jáne operator qyzmetin qarjylandyrý talaptary týraly kelisimdi bekitti.
Qujattar jer qoınaýyn paıdalanýshynyń atalǵan ýchaskeni ıgerý boıynsha birlesken qyzmetinde quqyqtary men mindetterin aıqyndaıdy. Osy oraıda «Lýkoıl» «QazMunaıGazdyń» Kaspıı qaırańynda jer qoınaýynyń osy ýchaskesin ıgerýde strategııalyq seriktesine aınaldy.
Ashyq kózderden alynǵan foto