Mınıstrlik Qazaqstanda kómir ne sebepti qymbattaǵanyn túsindirdi

ASTANA. QazAqparat - Qazaqstanda kómir baǵasynyń sharyqtaýyna deldaldar yqpal etýde. Bul týraly QR Energetıka mınıstrligi baspasóz qyzmeti málim etti, dep habarlaıdy QazAqparat.

«Karerden nemese shahtadan kómirdiń jiberiletin baǵasy aıtarlyqtaı joǵary emestigin atap ótemiz. Túpkilikti tutynýshylar úshin onyń baǵasynyń ósýine temirjol tarıfteri jáne deldaldyq uıymdardyń ústemeleri aıtarlyqtaı áser etedi. Bul rette  kommýnaldyq-turmystyq tutynýshylarǵa kómirdiń negizgi kólemi taýar bırjalary arqyly satylady», - dep atap ótilgen mınıstrlik málimetinde.

Belgili bolǵandaı, jyl saıyn jylý maýsymy ótý kezinde kómir óndirýshi kompanııalarǵa kómir tıeýge arnalǵan vagondardyń ýaqytynda usynylmaýy máselesi oryn alady.

Sonymen birge, QR Ulttyq ekonomıka mınıstrliginiń taldaýyna sáıkes, jer qoınaýyn paıdalanýshylardan kommýnaldyq-turmystyq tutynýshylarǵa deıingi kómir jóneltý kestesi kópdeńgeılik deldaldyq qurylymdardyń barlyǵyn kórsetedi. Nátıjesinde túpkilikti tutynýshydaǵy kómirdiń baǵasy eki-úsh esege ósip ketedi.

«Bul rette kómirge baǵa belgileý, saýdany retteý jáne deldaldyq qurylymdardy joıý Energetıka mınıstrliginiń quzyretine kirmeıtindigin atap ótemiz. Óńirlerde kómirdi satyp alý jáne halyq úshin taratý jergilikti atqarýshy organdar quzyretine jatady. QR Investıtsııalar jáne damý mınıstrligi men  «QTJ» AQ tarapy jylý maýsymy ótýi kezinde kómir tıeýge jyljymaly qurammen ýaqytynda qamtamasyz etý boıynsha is-sharalardy qabyldaý, al QR Ulttyq ekonomıka mınıstrligi tarapynan taýar bırjalary qyzmetin baqylaý sharalaryn atqarý qajet»,-dep paıymdaıdy EM ókilderi.

Málimetterge súıensek, bıylǵy  9 aıda ishki naryqqa 55,8 mln tonna kómir jóneltildi, onyń ishinde 40,5 mln tonna energııa óndirýshi kásiporyndarǵa jetkizildi  (2016 jyldyń 9 aıynda 34,5 mln tonna). Osy kezeńde kommýnaldyq-turmystyq qajettilikke jáne halyqqa 8 mln tonna jetkizildi, bul 2016 jylǵy sáıkes kezeńmen salystyrǵanda 1,5 mln tonnaǵa artyq.

Ońtústik Qazaqstan oblysy ákimdiginiń aqparatyna sáıkes, 5 qazandaǵy jaǵdaı boıynsha óńirdegi kómir qoımalarynda  kómirdiń jetkilikti kólemi bar. Osy oraıda Shubarkól kómiri - 12,5 myń teńge, Maıkóbe - 8,5 myń teńge deńgeıinde baıqalyp otyr

Qaraǵandynyń kómir qoımalary toltyrylǵan, bir tonna kómirdiń baǵasy 6 myń teńgeden bastap (Saryadyr kómiri) 11 myń teńgege deıin (Shubarkól kómiri).

Astananyń eki kómir qoımasynda Shubarkól kómirine joǵarǵy baǵa 14 myń teńgeni quraıdy (Maıkóbe kómiri - 8,5  myń teńge).

Almatyda bir tonna kómirdiń baǵasy 15 myń teńgeden bastap (Qarajyra kómiri) 23 myń teńgege deıin (Shubarkól kómiri).