Mınıstrlik elektr qýatynyń tutyný kólemin qashyqtan esepke alatyn qurylǵy ornatýdy usyndy

ASTANA. QazAqparat – Elektr energııasynyń tutyný kólemin ólsheıtin ındýktsııalyq aspaptardan bas tartyp, ornyna qashyqtan esepke alatyn qurylǵylardy ornatý qajet. Mundaı usynys Indýstrııa jáne ınfraqurylymdyq damý mınıstrligi ashyq talqyǵa shyǵarǵan «2023-2029 jyldarǵa arnalǵan turǵyn úı-kommýnaldyq ınfraqurylymyn damytý tujyrymdamasynda» aıtylǵan, dep habarlaıdy QazAqparat tilshisi.

«Elektrmen jabdyqtaý salasynda esepke alý aspaptarymen qamtamasyz etilý deńgeıi – 100%. Biraq, olardyń kópshiligi eski úlgide jáne energııa tıimdiligi talaptaryna sáıkes kelmeıdi. Eń tómen toqpen jumys isteıtin zamanaýı turmystyq aspaptar men elektr qondyrǵylary mehanızmi syrtqy aýa temperatýrasy sýyq bolǵanda kóp qatelik jiberedi, kórsetkishti durys esepke almaıdy. Bul kommertsııalyq shyǵyndardyń paıda bolýyna ákeledi. Qazirgi kezde ındýktsııalyq esepke alý aspaptary ólsheý quraldarynyń memlekettik tiziliminen shyǵarylmaǵan. Tıisinshe, olar áli qoldanysta. Sondyqtan, bul aspaptardy paıdalanýdy kezeń-kezeńmen tómendetip, keıin kórsetkishterdi qashyqtan esepke alatyn aspaptaryn ornatý qajet dep esepteımiz», - dep jazylǵan qujatta.

Vedomstvo aqparatyna qaraǵanda, elimizde elektr energııasyn óndirýmen aınalysatyn 567-den astam kásiporyn bar. Olar byltyr barlyq sektorǵa saǵatyna 113 mlrd kVt elektr qýatyn berip otyrdy.

Qujatty ashyq talqylaý 15 naýryzǵa deıin jalǵasady.