Mınıstrlik dárigerlerdiń qaýipsizdik máselesin sheshýdi usyndy

ASTANA. QazAqparat – Densaýlyq saqtaý mınıstrligi medıtsına qyzmetkerlerine naýqastar tarapynan jasalatyn shabýyldar máselesin sheshýdiń jolyn usyndy. Bul týraly atalǵan vedomstvo ázirlegen arnaıy tujyrymdamada baıandalǵan, dep habarlaıdy QazAqparat tilshisi.

«Tájirıbe kórsetkendeı, patsıentter medıtsınalyq qatelik jibergen dárigerlerge shaǵymdanyp qana qoımaıdy, sonymen qatar dárigerlerdiń ar-namysy men qadir-qasıetine kereǵar áreketterge barady. Qańtar aıyndaǵy tótenshe jaǵdaı kezinde 20 densaýlyq saqtaý nysanyna shabýyl jasaldy. Onyń ishinde bes statsıonar, bir MSAK nysany, Almatyda ornalasqan 14 dárihana bar. Osy kezeńde jeti medıtsına qyzmetkeri zardap shekti, onyń beseýi Almatyda, bireýi Shymkent pen Almaty oblysynda. Sonymen qatar, laýazymdyq ókilettikterin júzege asyrý kezinde jedel medıtsınalyq járdem qyzmetiniń medıtsına qyzmetkerlerine shabýyl jasaý faktileri bar. Medıtsına qyzmetkerlerine shabýyl jasalǵan jaǵaıda olardy quqyqtyq qorǵaý tetigi qajet.

Emdeýshi dáriger medıtsınalyq uıymnyń (bólimshesiniń) tıisti laýazymdy adamymen (basshysymen) kelisim boıynsha patsıentti baqylaýdan jáne ony emdeýden 3 shart boıynsha bas tarta alady:

1) patsıentti basqarýdan bas tartý onyń ómirine qaýip tóndirmeıdi;

2) emdeýdi júrgizýden bas tartý basqalardyń densaýlyǵyna qaýip tóndirmeıdi;

3) júrgizýden bas tartý ákimshilik basqarmanyń laýazymdy adamymen kelisilgen.

Osy usynystar negizinde dáriger men patsıenttiń quqyqtyq qatynastaryn normatıvtik quqyqtyq retteý tetigin ázirleý qajet. Osyǵan baılanysty psıhıkalyq minez-qulyq buzylysy aýrýy bar adamnyń, onyń ishinde esirtki zattaryn qoldanýmen baılanysty adamnyń áleýmettik qaýiptiligi retinde jańa tujyrymdamany engizý usynylady», - dep kórsetilgen qujatta.