Mınıstrlik ChVK «Vagner» qataryna ótken qazaq stýdenti týraly: Ol áskerı qyzmetke jaramsyz bolatyn

ASTANA. QazAqparat – Bas shtab bastyǵy - QR Qarýly kúshteri qurlyq áskerleri bas qolbasshysynyń birinshi orynbasary Qanysh Ábýbákirov ortalyq kommýnıkatsııalar qyzmetinde ótken brıfıngide «Vagner» jekemenshik áskerı kompanııasyna ótken qazaqstandyq týraly pikir bildirdi, dep habarlaıdy QazAqparat tilshisi.

BAQ ókili Qorǵanys mınıstrliginiń ókilderinen reseılik ChVK «Vagner» jekemenshik áskerı kompanııasynyń sapyna ótti delingen 23 jastaǵy qazaqstandyq jigit týraly surady.

«Bul keleńsiz oqıǵanyń ózge óńirlerde bolmaýy úshin qandaı shara qabyldanady?» dep surady jýrnalıst.

Qanysh Ábýbákirovtiń aıtýynsha, ol azamat óz kezinde Qazaqstan Qarýly Kúshteriniń quramynda boryshyn óteýge jaramsyz dep tanylǵan.

«Ol azamat týraly aıtsaq, kezinde Qazaqstan Qarýly kúshteriniń quramynda áskerı qyzmet etýge jaramsyz dep tanylǵan. Qalǵan málimetke kelsek, qazirgi tańda bul máselemen aınalysyp jatqan ózge organdar bar. Solar atalǵan azamattyń áreketine quqyqtyq baǵa beredi», - dedi Bas shtab bastyǵy.

Eske sala keteıik, buǵan deıin Reseıde oqıtyn qazaqstandyq stýdent óz erkimen ChVK «Vagnermen» kelisimshartqa otyrǵanyn jazǵan edik.

Keıin QR Syrtqy ister mınıstrligi stýdenttiń Qazaqstanda qylmystyq jaýapqa tartylatynyn málimdedi.