Mınıstrlik chatyna balalar kóbinde ata-anamen ursyp qalǵanda, alǵashqy mahabbat máselesimen shaǵymdanady

ASTANA. QazAqparat - Túrli jaǵdaılarǵa tap bolǵan oqýshylar «Bala Qorgau» aqparat taqtaıshasyndaǵy QR-kodty skanerlep, konsýltatsııalyq kómek suraı alady. Taqtaısha elimizdegi 7 myńǵa jýyq mektepke qoıylǵan, dep habarlaıdy QazAqparat Oqý-aǵartý mınıstrligine silteme jasap.

Veb-saıtqa kirgen oqýshy men ata-ana aldyn ala jazylǵan keńesterdi oqyp, suraq joldaı alady.

Olardyń saýalyna arnaıy chatta mamandar jaýap beredi. Habarlama arqyly sóılesip, kómek kórsetiledi.

Ótinish berýshiniń aty-jóni qupııa saqtalady.

«Bıyl jyl basynan bastap saıtqa 70-ten asa ótinish tústi, basym bóligi balalardan kelgen. Olar ata-anasymen aradaǵy túsinispeýshilik, bala mahabbat, dostarynyń arasyndaǵy qarym-qatynastyń buzylýy týraly máselelermen habarlasqan. Biz ár suraqqa ýaqytyly jaýap beremiz, al óńirlerdegi mektep oqýshylarynan kelgen suraq bolsa, oblystaǵy mamandar jaýap berip, baılanys jasaıdy»,- deıdi bala quqyqtaryn qorǵaý komıtetiniń basqarma sarapshysy Elmıra Kadımova.

Veb-saıtta oqýshylar ǵana emes, eresekter de problemalyq jaǵdaılardy sheshý boıynsha keńestermen tanysa alady.

«Bala Qorgau» oqýshylardyń, sondaı-aq olardyń ata-anasynyń quqyqtyq saýatyn arttyrýǵa kómektesedi.

Veb-saıtqa myna silteme arqyly kirýge bolady.