Mınıstrlik balalardy koronavırýstan qorǵaýǵa qatysty ózekti suraqtarǵa jaýap berdi
Belgili bolǵandaı, medıtsına qyzmetkeriniń eńbekaqysyna ústeme beriledi.
«Ústemeaqy alatyndardyń tizimin jedel shtab janynda qurylǵan óńirlik komıssııalar qalyptastyrady. Al komıssııa tóraǵalary retinde ákim orynbasarlary qyzmet etýde. Sonymen qatar, onyń quramynda medıtsınalyq saqtandyrý qory fılıaldarynyń qyzmetkerleri, óńirlik bas sanıtar dárigeri, densaýlyq saqtaý basqarmasynyń jáne úkimettik emes uıymdar ókilderi qamtylǵan», - dedi resmı ókil.
Onyń sózine qaraǵanda, atalǵan tizim negizinde medıtsına qyzmetkerlerine tólem jasalady.
«Bul turǵyda qordyń málimetinshe, vırýstyq ınfektsııa jaǵdaıynda jumysqa tartylǵan medıtsına qyzmetkerleriniń sany aı saıyn ósken. Eger naýryzda osy ústemeaqyny 19 adam alsa, maýsym aıynda olardyń sany 53 myńǵa deıin jetti. Al shilde aıynyń qorytyndysy boıynsha óziniń jalaqysyna ústemeaqyny 78 myń qyzmetker alady», - dedi Qojahmetov.
Sonymen qatar, Covid-19 indetinen qaıtys bolǵan medıtsına qyzmetkerleriniń otbasyna 10 mln teńge somasynda ótemaqy tólenip jatyr.
Resmı ókil koronavırýsqa qarsy vaktsınany satyp alýǵa qatysty túsindirdi. Qazirgi kezde COVID-19 indetine qarsy vaktsınany alý týraly qandaı da bir naqty sheshim jasalmaǵanyn aıtty.
«Osy vaktsınalardy daıarlaýmen aınalysyp jatqan eń aldyńǵy qatarly zerthanalar úshinshi kezeńge jetti, ıaǵnı klınıkalyq synaq fazasynda tur. Olar tórtinshi kezeńdi ótkizýi kerek. Osydan keıin barlyq halyqaralyq sertıfıkattardan ótkennen soń, tıisti elderdi bul vaktsına jappaı óndirýge shyǵarylady», - dedi ol.
Munymen qosa, Baǵdat Qojahmetov sabaq kezinde balalarǵa medıtsınalyq qolǵap kıgizýdi mindetteý týraly áleýmettik jelidegi aqparatqa pikir bildirdi.
«Balalarǵa qolǵap kıgizý mindetti emes ekenin aıtqym keledi. Áleýmettik jelide taraǵan bul aqparat shyndyqqa janaspaıdy», - dedi ol
Degenmen, sabaq kezinde balalarǵa maska taǵý kerek bolady. Sebebi balalar koronavırýspen sırek aýyrsa da, aýrýdy tasymaldaıdy. Sáıkesinshe, indetti eresek adamdarǵa juqtyrýy múmkin.
Óz kezeginde «Pedıatrııa jáne balalar hırýrgııasy ǵylymı ortalyǵy» AQ basqarma tóraıymy, medıtsına ǵylymynyń doktory Rıza Boranbaeva balalar arasyndaǵy koronavırýs ınfektsııasynyń taralýy jaǵdaıy týraly aıtty.
«Balalar koronavırýs ınfektsııasyna sırek shaldyǵady. Jetkinshekterde indet kóbinese sımptomsyz ári jeńil formada ótedi. Degenmen balalar arasynda da indet aýyr túrde boldy. Jalpy, indet bastalǵaly Qazaqstanda koronavırýs ınfektsııasymen 2,5 myńǵa jýyq bala aýyrdy, onyń ishinde 111-i jańa týǵan náreste. Balalardyń 80 paıyzynda COVID-19 sımptomsyz ári jeńil formada ótedi. Tek 20 paıyzy indetti ortasha aýyr jáne aýyr formada eńserdi», - dedi R. Boranbaeva.
Budan bólek ol balalar arasyndaǵy Kavasakı tárizdi sındrom týraly aıtty.
«2020 jyldyń sáýir-mamyrynda COVID-19 indetine shaldyǵý deńgeıi joǵary bolǵan elderde balalar arasynda koronavırýs indetin eńsergennen keıin pedıatrııalyq mýltıjúıelik qabyný sındromy formasynda jańa aýrý tirkele bastaldy. Ol ýaqytsha COVID-19 indetimen baılanystyryldy. Osy patologııa postınfektsııalyq sındrom bolyp sanalady, COVID-19-ǵa shaldyqqannan keıin 3-5 aptadan soń baıqalady. Buǵan naýqastardyń qanyndaǵy antıdeneler dálel bolady. Onyń basqasha ataýy - Kavasakı tárizdi sındrom. Óıtkeni, ol Kavasakı aýrýymen klınıkalyq jaǵynan uqsas, alaıda tıisti aıyrmashylyqtary bar. Olardyń negizgisine toqtalsaq, Kavasakı aýrýy kishkentaı balalarda baıqalady, ıaǵnı kóbine eki jastaǵylar arasynda», - dedi dáriger.
Onyń aıtýynsha, mýltıjúıelik qabyný sındromyn emdeýdegi eń bastysy - ol erte kezeńde dıagnostıkadan ótkizý. Kavasakı tárizdi sındromnyń negizgi klınıkalyq sımptomyna toqtalsaq, 24 saǵat ishinde dene qyzýynyń joǵary bolýy baıqalady. Mýltıjúıelik qabyný sındromyna kúdik bolsa, balany aýrýhanaǵa jatqyzylýy kerek.
Búginde elimizde balalar arasynda Kavasakı tárizdi sındromǵa shaldyǵýdyń 16 oqıǵasy tirkeldi. Sonyń ishinde 8 bala emdelip shyqty, al qalǵandary aýrýhanalarda em qabyldaýda.
Aıta keteıik, Densaýlyq saqtaý mınıstrligi balalar arasynda COVID-19 indetin emdeýdiń klınıkalyq hattamasyn ázirledi.
Osy oraıda Rıza Boranbaeva Qazaqstanda endi 3 hattama bolatynyn atap ótti. Birinshi hattama eresekterge, ekinshisi júkti áıelderge, sondaı-aq úshinshi hattama balalar arasyndaǵy COVID-19 indetine arnalǵan.
«Hattama daıyn, ony osy aptada qarastyryp, bekitemiz dep oılaımyn. Atap aıtqanda, balalardy emdeý júrip jatyr, sebebi COVID-19-dyń dıagnostıkasy men em-dom sharalary jalpy hattamada boldy. Qazir biz ony keńeıtip, júıelendirdik, sondaı-aq mýltıqabyný sındromyn (Kavasakı tárizdi sındrom) engizdik. Meniń oıymsha, hattama apta ishinde bekitiletin bolady», - dedi dáriger.