Mınıstrlik «Artsportqa» qatysty keıbir úıirmelerdi jazalaýdy usyndy

NUR-SULTAN. QazAqparat – Búgin elordada «Artsport» jobasyna qatysty qoǵamdyq tyńdaý ótti. Іs-sharaǵa Mádenıet jáne sport mınıstrliginiń, «Atameken» UKP-nyń, qoǵamdyq birlestikterdiń ókilderi, ata-analar qatysty, dep habarlaıdy QazAqparat tilshisi.

«Búginde zańdamada ózderiniń mindettemelerin tıisti deńgeıde oryndamaıtyn sporttyq jáne shyǵarmashylyq tapsyrystar boıynsha qyzmetterdi jetkizýshilerdiń jaýapkershiligi kózdelmegen. Osy oraıda balalar men jasóspirimderge arnalǵan sporttyq sektsııalar men úıirmelerde memlekettik sport jáne shyǵarmashylyq tapsyrystar talabynyń saqtalýyna baqylaý júrgizý quziretin jergilikti atqarýshy organdarǵa júkteý usynylady», - dedi is-shara barysynda QR Mádenıet jáne sport mınıstrligi Mádenıet komıteti tóraǵasynyń orynbasary Kúmis Seıitova.

Onyń atap ótýinshe, 2020 jyly qoldanystaǵy zańǵa jan basyna qarjylandyrýǵa qatysty túzetýler engizildi. 2021 jyly zań kúshine enip, mamyr aıynan bastap jan basyna qarjylandyrý júzege asa bastady.

«Biraq búginge deıin atalǵan qyzmetti kórsetýge qatysty suraqtar týyndap keledi. Sondyqtan memlekettik sporttyq jáne shyǵarmashylyq tapsyrysty oryndaýǵa qatysatyn jeke kásipkerlik sýbektileri zań buzýshylyq úshin ákimshilik jaýapkershilik belgileý usynylyp otyr», - dedi ol.

Kúmis Seıitovanyń aıtýynsha, zań buzýshylyq birinshi ret tirkelgende eskertý túrindegi ákimshilik jaza belgileý qajet. Al odan keıin qaıtalanǵan jaǵdaıda jeke tulǵalarǵa 20 aılyq eseptik kórsetkish (61 260 teńge) kóleminde aıyppul salynady. Shaǵyn kásipkerlik sýbektilerine 30 AEK (91 890 teńge), orta kásipkerlik sýbektilerine 50 AEK (153 150 teńge), iri kásipkerlik sýbektilerine 100 AEK (306 300 teńge) mólsherinde aıyppul salý kózdeledi.

«Memlekettik sport jáne shyǵarmashylyq tapsyrystardy tıisti deńgeıde oryndamaǵany úshin ákimshilik jaýapkershilik engizý taraptarǵa oń áserin tıgizedi», - dedi Mádenıet jáne sport mınıstrliginiń ókili.