Mınıstrlik AQSh-ta qaraqshylarǵa toıtarys bergen qazaq jigiti jaıynda pikir bildirdi

ASTANA. QazAqparat – Syrtqy ister mınıstrliginiń resmı ókili Aıbek Smadııarov AQSh-ta júrgen qazaqstandyq Oljas Qaldybaevqa jasalǵan qaraqshylyq shabýyldyń mán-jaıyn baıandady, dep habarlaıdy QazAqparat tilshisi.

«Málim bolǵandaı, bizdiń eldiń azamatyna jergilikti qylmystyq top shabýyl jasaǵan. Olar onyń sómkesin alyp qoımaq bolǵan. Aıtýynsha, sómekede qujattar jáne aqsha bolǵan. Qazirgi ýaqytta quqyq qorǵaý organdary qazaqstandyqtyń sómkesin urlaǵan qylmyskerlerdi izdestirip jatyr. Shabýyl kezinde Qazaqstan azamaty jeńil jaraqat alǵan, medıtsınalyq kómekten bas tartty. Onyń ómirine qaýip tónip turǵan joq. Ol atalǵan elge zańdy negizde barǵan», - dep túsindirdi Aıbek Smadııarov.

Mınıstrlik ókiliniń dereginshe, Oljas Qaldybaev áýe dıspetcheri mamandyǵy boıynsha Latvııada bilim alyp júr. Al, Maıamıge oqý boıynsha eki aılyq kýrsqa barǵan.

Eske salaıyq, keshe áleýmettik jelilerde AQSh-ta júrgen qazaqstandyq Oljas Qaldybaevqa qaraqshylyq shabýyl jasalǵany jáne qazaq jigiti qylmyskerlerge toıtarys berip, qarýyn tartyp alǵany týraly vıdeolar tarady.

Óziniń aıtýynsha, tapansha men myltyq ustaǵan úsh jigit sómkesin tartyp alǵan.

Biraq keıin olardyń birin qýyp júrip ustaǵan jáne ony jibermeı otyryp polıtseılerdi kútken. Barlyǵyn vıdeoǵa túsirip alǵan.

Sol kezde qaraqshynyń eki dosy ony bosatý úshin qaıta oralǵan. Qoldarynda tapansha bolǵan. Olar qazaq jigitine shabýyl jasaǵan.

Alaıda, Oljas kútpegen jerden qarsylyq kórsetip, qarýdy tartyp alǵan. Urylar qashyp ketken.

Kóp uzamaı polıtseıler jetken. Qaraqshylardy izdeýge 6 polıtsııa kóligi men tikushaq jumyldyryldy.