Mınıstrler Pavlodar jáne Aqmola oblystarynyń turǵyndarymen kezdesedi

NUR-SULTAN. QazAqparat – 8-9 qarashada QR Premer-Mınıstriniń orynbasary Berdikbek Saparbaev bastaǵan Úkimettegi jumys toby Pavlodar jáne Aqmola oblystaryna jumys saparymen barady, dep habarlaıdy QazAqparat vıtse-premerdiń baspasóz qyzmetine silteme jasap.

Jumys tobynyń quramyna Úkimettiń áleýmettik blog: bilim jáne ǵylym, densaýlyq saqtaý, eńbek jáne halyqty áleýmettik qorǵaý, mádenıet jáne sport, aqparat jáne qoǵamdyq damý mınıstrlikteriniń basshylary kiredi.

Jumys tobynyń músheleri óńirlerde turǵyndarmen, ujymdarmen, densaýlyq saqtaý jáne bilim berý isiniń qyzmetkerlerimen kezdesedi. Azamattardy jeke suraqtar boıynsha qabyldap, áleýmettik jáne mádenı nysandardy, aýyldyq jerlerdi aralaıdy.

Sapardyń negizgi maqsaty – Prezıdenttiń «Syndarly qoǵamdyq dıalog - Qazaqstannyń turaqtylyǵy men órkendeýiniń negizi» atty Qazaqstan halqyna Joldaýynda belgilengen mindetterdi el Úkimeti oryndap jatqany týraly halyqty habardar etý.

Budan buryn úkimettik jumys tobynyń ókilderi Atyraý, Aqtóbe, Qaraǵandy, Qyzylorda, Shyǵys Qazaqstan, Batys Qazaqstan, Túrkistan oblystary men Almaty jáne Shymkent qalalary turǵyndarymen kezdesti.